काठमाडौं । जनमत पार्टीको अध्यक्षमा डा. सीके राउत पुनः निर्विरोध हुने भएका छन्। पार्टीको दोस्रो महाधिवेशनका लागि अध्यक्ष पदमा राउतको मात्र उम्मेदवारी परेपछि उनी पुनः अध्यक्ष हुने निश्चित भएको हो।
असोज ९ गतेदेखि सुरु हुने महाधिवेशनका लागि असोज १ गते उम्मेदवारी दर्ता भएको थियो। विभिन्न पदमा १०३ जनाले उम्मेदवारी दिएकामा अध्यक्षमा राउतको मात्र उम्मेदवारी परेको जनमत पार्टीका निवर्तमान महासचिव चन्दन सिंहले जानकारी दिए।
अध्यक्षसहित अन्य पदाधिकारीको आधिकारिक घोषणा असोज १० गते गरिने उनले बताए। अध्यक्षबाहेक अन्य पदमा भने प्रतिस्पर्धा छ। उम्मेदवारी फिर्ता लिने समय आइतबार साँझ ५ बजेसम्म तोकिएको छ। हालसम्म कुनै उम्मेदवारले उम्मेदवारी फिर्ता नलिएको र सहमतिको प्रयास भइरहेको सिंहले बताए।
सात उपाध्यक्ष पदका लागि १४ जना, महासचिवका लागि तीन जना, उपमहासचिवका लागि दुई जना र सात सचिव पदका लागि १० जनाले उम्मेदवारी दिएका छन्। कार्यकारिणी समिति सदस्यका लागि ७३ जनाको उम्मेदवारी परेको छ।
एकभन्दा बढी उम्मेदवारी परेको पदमा निर्वाचन हुने भए पनि त्यसअघि सहमतिको प्रयास भइरहेको सिंहले बताए।
‘चुनाव एउटा विकल्प छँदैछ, त्यसअघि सर्वसम्मति गर्ने प्रयास भइरहेको छ। सर्वसम्मति नभए अर्को विकल्पमा पनि जान सकिन्छ, त्यो हो पदाधिकारी चयन गर्ने जिम्मेवारी अध्यक्षलाई नै दिने। कुनै कुरामा सहमति नभए अन्तिम विकल्प चुनाव छँदैछ,’ उनले भने।
उपाध्यक्षमा वसन्तकुमार कुशवाहा, अनिता साह, अनिता मण्डल, डा. जयकान्त राउत, नरेन्द्रप्रसाद चौधरी, माधवप्रसाद सिंह, राजकुमार यादव (त्यागी), डा. कमरुल्लाह अंसारी, संजयकुमार मिश्र, मदनेशकुमार चौधरी, परमेश्वर मुर्मु, रोशन खातुन, हरपाल सिंह सोडी र मनोहरी देवी बैठाले उम्मेदवारी दिएका छन्।
महासचिवमा चन्दन सिंह, ममता झा र संजयकुमार यादव तथा उपमहासचिवमा निर्मल कुमार मण्डल र ललितचन्द्र मल्लिकको उम्मेदवारी परेको छ।
सचिव पदमा सन्तोषकुमार सहनी, सुरेन्द्र शर्मा मधेशी, हरेन्द्र चौधरी, अञ्जनीदेवी, रोहित महतो, पारसप्रसाद साह, राधाकुमारी यादव, बालगोविन्द चौधरी, वीरेन्द्र महतो (जीवन त्यागी) र रामबाबु साहले उम्मेदवारी दिएका छन्। जनमत पार्टीको दोस्रो महाधिवेशन पर्साको वीरगञ्जमा असोज ९ र १० गते हुँदैछ।
