एजेन्सी । विश्व फुटबलका महान् खेलाडी क्रिस्टियानो रोनाल्डो अब आफ्नो लामो समयदेखिकी जीवनसाथी जर्जिना रोड्रिगेजसँग विवाह बन्धनमा बाँधिने भएका छन्। करिब आठ वर्ष लामो प्रेम सम्बन्ध, सुख–दुःखका अनगिन्ती क्षण र पारिवारिक यात्रापछि यी चर्चित जोडीले आफ्नो सम्बन्धलाई विवाहमार्फत नयाँ अध्यायमा प्रवेश गराउने तयारी गरेका हुन्।
अन्तर्राष्ट्रिय सञ्चारमाध्यमका अनुसार रोनाल्डो र जर्जिनाको विवाह रोनाल्डोको जन्मभूमि माडेरामा हुने भएको छ। माडेराको राजधानी फुन्चालस्थित ऐतिहासिक फुन्चाल क्याथेड्रलमा आगामी अगस्ट ८, शनिबार दिउँसो ३ बजे भव्य विवाह समारोह आयोजना गरिने तयारी गरिएको छ। विवाह समारोहका लागि उनीहरूले फुन्चालस्थित पाँचतारे साभोय प्यालेस होटल समेत आरक्षण गरिसकेका छन्। समारोहको तयारीका कारण होटलका केही तला र विशेष क्षेत्र केही समयका लागि बन्द रहने जनाइएको छ।
रोनाल्डो र जर्जिनाको पहिलो भेट सन् २०१७ को सुरुआतमा भएको थियो। त्यतिबेला जर्जिना एक प्रतिष्ठित फेसन ब्रान्डको पसलमा बिक्री सहायकका रूपमा कार्यरत थिइन्। त्यही भेटबाट सुरु भएको चिनजान विस्तारै प्रेममा परिणत भयो।जर्जिनाले आफ्नो वृत्तचित्र ‘आइ एम जर्जिना’मा सम्बन्धको सुरुआती दिन सम्झँदै रोनाल्डो काम सकिएपछि आफूलाई लिन आउने गरेको प्रसङ्ग सुनाएकी छन्।
सन् २०१७ जनवरीमा यो जोडी पहिलो पटक एक अन्तर्राष्ट्रिय फुटबल अवार्ड समारोहमा सार्वजनिक रूपमा देखिएको थियो। त्यसको केही समयपछि उनीहरूले सामाजिक सञ्जालमार्फत आफ्नो प्रेम सम्बन्ध सार्वजनिक गरे। त्यही वर्ष सरोगेसीमार्फत जन्मिएका जुम्ल्याहा सन्तानको स्वागत गरेपछि परिवार अझ विस्तारियो। त्यसपछि उनीहरूको पहिलो सन्तान अलाना मार्टिना जन्मिइन्। पछि सन् २०२१ मा उनीहरूले पुनः जुम्ल्याहा सन्तानको प्रतीक्षा गरिरहेको खुसी साटेका थिए।
तर सन् २०२२ मा उनीहरूको जीवनमा ठूलो पीडा आइपर्यो। जुम्ल्याहा सन्तानमध्ये छोरी सुरक्षित जन्मिइन् भने छोरा जन्मकै क्रममा बिते। यो दुःखद घटनाले विश्वभरका समर्थकलाई भावुक बनाएको थियो। बाँच्न सफल छोरीको नाम बेला एस्मेराल्डा राखिएको छ।
आठ वर्ष लामो प्रेम सम्बन्धपछि जर्जिनाले सन् २०२५ अगस्टमा सामाजिक सञ्जालमार्फत इन्गेजमेन्ट सार्वजनिक गरेकी थिइन्। उनले हिराको औँठीको तस्बिर सेयर गर्दै लेखेकी थिइन्- ‘हो, म स्वीकार्छु। यही जीवनमा मात्र होइन, हरेक जीवनमा पनि।’
अब प्रेम, विश्वास, संघर्ष र परिवारको सुन्दर यात्रापछि क्रिस्टियानो रोनाल्डो र जर्जिना रोड्रिगेज वैवाहिक जीवनमा प्रवेश गर्न लागेका छन्। विश्वभरका करोडौँ फुटबल समर्थकका लागि उनीहरूको विवाह केवल एउटा व्यक्तिगत उत्सव मात्र होइन, वर्षौँदेखि चर्चामा रहेको प्रेमकथाको सुखद समापन र नयाँ जीवनयात्राको सुरुआत पनि बनेको छ।
