काठमाडौं । साविक विजेता अर्जेन्टिनाले अन्तिम क्षणमा शानदार पुनरागमन गर्दै इङ्ग्ल्यान्डलाई २–१ ले पराजित गरेको छ। यससँगै अर्जेन्टिनाले फिफा विश्वकप २०२६ को फाइनलमा स्थान सुरक्षित गर्दै लगातार दोस्रो पटक उपाधि भिडन्तमा प्रवेश गरेको छ।
अमेरिकाको एटलान्टा स्टेडियममा सम्पन्न दोस्रो सेमिफाइनलमा इङ्ग्ल्यान्डले खेलको ५५औँ मिनेटमा एन्थोनी गोर्डनको गोलबाट अग्रता लिएको थियो। मोर्गन रोजर्सको उत्कृष्ट पासलाई गोर्डनले नजिकबाट जाली चुमाएका थिए।
पहिलो हाफमा दुवै टोलीले केही उत्कृष्ट अवसर सिर्जना गरेका थिए। इङ्ग्ल्यान्डका गोलरक्षक जोर्डन पिकफोर्डले निको गोन्जालेजको प्रहार शानदार रूपमा बचाएका थिए भने एलेक्सिस म्याक एलिस्टरको हेडर पोस्टमा लागेको थियो।
खेल इङ्ग्ल्यान्डको पक्षमा जाँदै गरेको अवस्थामा अर्जेन्टिनाले अन्तिम पाँच मिनेटमा अविश्वसनीय पुनरागमन गर्यो। ८५औँ मिनेटमा इन्जो फर्नान्डेजले कप्तान लियोनल मेस्सीको पासलाई सदुपयोग गर्दै बराबरी गोल गरे।
त्यसपछि इन्जुरी समयको दोस्रो मिनेटमा फेरि मेस्सीकै उत्कृष्ट असिस्टमा लाउटारो मार्टिनेजले निर्णायक गोल गर्दै अर्जेन्टिनालाई २–१ को रोमाञ्चक जित दिलाए।
यस जितसँगै अर्जेन्टिना लगातार दोस्रो पटक विश्वकपको फाइनलमा पुगेको छ। अब उसले उपाधिका लागि स्पेनसँग प्रतिस्पर्धा गर्नेछ। यता इङ्ग्ल्यान्डको १९६६ यता पहिलो पटक पुरुष विश्वकप फाइनल पुग्ने सपना फेरि अधुरै रह्यो। प्रशिक्षक थोमस टुचेलको टोलीले अब तेस्रो स्थानका लागि फ्रान्ससँग प्रतिस्पर्धा गर्नेछ।
