काठमाडौं । फिफा विश्वकप २०२६ मा अर्जेन्टिनालाई लगातार दोस्रोपटक फाइनलमा पुर्याएका कप्तान लियोनल मेसी ‘गोल्डेन बुट’को दौडमा शीर्ष स्थानमा उक्लिएका छन्। गएराति इंग्ल्यान्डविरुद्धको सेमिफाइनलमा दुई असिस्ट प्रदान गर्दै मेसीले अर्जेन्टिनाको जितमा महत्वपूर्ण भूमिका खेले। यससँगै उनले गोल्डेन बुटको प्रतिस्पर्धामा फ्रान्सका कप्तान किलियन एम्बाप्पेलाई पछि पारेका हुन्।
जारी प्रतियोगितामा मेसी र एम्बाप्पे दुवैले ८–८ गोल गरेका छन्। तर, मेसीको ४ असिस्ट पुगेको छ भने एम्बाप्पेको ३ असिस्ट मात्रै रहेकाले उनी शीर्ष स्थानमा पुगेका छन्। मेसीको प्रेरणामा अर्जेन्टिनाले इंग्ल्यान्डलाई हराउँदै लगातार दोस्रो विश्वकप फाइनलमा स्थान बनाएको हो। अर्जेन्टिना सन् २०२२ को विश्वविजेता टोली पनि हो।
विश्वकप इतिहासमा मेसीले हालसम्म ३३ खेल खेल्दै २१ गोल र ११ असिस्ट गरेका छन्। यता २६ वर्षीय एम्बाप्पेले विश्वकपमा २० गोल पूरा गरिसकेका छन्। अब फ्रान्सले शनिबार तेस्रो स्थानका लागि इंग्ल्यान्डसँग प्रतिस्पर्धा गर्नेछ भने अर्जेन्टिनाले सोमबार हुने फाइनलमा स्पेनसँग उपाधिका लागि भिड्नेछ।
यता नर्वेका एर्लिङ हालान्डले जारी विश्वकपमा ७ गोल गरेका छन्। तर, नर्वे प्रतियोगिताबाट बाहिरिसकेकाले उनको गोल संख्या बढ्ने सम्भावना समाप्त भएको छ।
विश्वकपको व्यक्तिगत पुरस्कारमध्ये प्रतिष्ठित मानिने ‘गोल्डेन बुट’ सर्वाधिक गोल गर्ने खेलाडीलाई प्रदान गरिन्छ। यदि गोल संख्या बराबर भएमा असिस्ट र त्यसपछि कम खेल समयलाई निर्णायक आधार मानिन्छ। स्मरण रहोस्, सन् २०२२ को विश्वकपमा किलियन एम्बाप्पेले गोल्डेन बुट जितेका थिए।
