काठमाडौं । साताको पहिलो कारोबार दिन आइतबार सेयर बजारमा ठूलो गिरावट आएको छ । नेप्से परिसूचक अघिल्लो कारोबार दिनको तुलनामा २७.१४ अंकले घटेर २७६१.२२ विन्दुमा झरेको छ ।
गत बिहीबार सामान्य अंकको सुधार देखिएको बजारमा आइतबार भने फराकिलो गिरावट देखिएको हो । सोही दिन सेन्सेटिभ इन्डेक्स ५.१५ अंकले घट्दा फ्लोट इन्डेक्स १.७४ अंक र सेन्सेटिभ फ्लोट इन्डेक्स १.५५ अंकले ओरालो लाग्यो ।
यद्यपि बजार घटेपनि कारोबार रकम भने बढेको छ । नेप्सेअनुसार आइतबार २४९ कम्पनीका २ करोड ५ लाख १३ हजार ६२५ कित्ता सेयर खरिदबिक्री हुँदा कुल ७ अर्ब ७३ करोड ५१ लाख रुपैयाँ बराबरको कारोबार भयो । गत बिहीबारको कारोबार ७ अर्ब ४६ करोड ४१ लाख रुपैयाँमा सीमित भएको थियो ।
मूल्य वृद्धि गर्ने कम्पनीमध्ये आरबीबी म्युचुअल फण्ड–१ सर्वाधिक ७.९३ प्रतिशतले उक्लियो । त्यसैगरी, अपर स्याङ्गी हाइड्रोपावर ६.२९ प्रतिशतले बढ्दा, कालिका पावर र अपर हेवा खोला हाइड्रोपावर को मूल्य ५ प्रतिशतभन्दा बढीले बढेको छ । तर, सम्पदा लघुवित्त ७.०६ प्रतिशतले घट्दै दिनको सबैभन्दा कमजोर प्रदर्शनकर्ता बन्यो । सोसँगै ट्रेड टावर कम्पनी को सेयर मूल्य ५.८८ प्रतिशतले घट्यो ।
कारोबार रकमका आधारमा नेपाल रिइन्स्योरेन्स कम्पनी शीर्षमा रह्यो । यस कम्पनीको ५१ करोड ६७ लाख रुपैयाँ बराबरको सेयर किनबेच भयो । त्यसपछि हिमालयन रिइन्स्योरेन्स कम्पनी (३५ करोड ४५ लाख) र नेपाल रिपब्लिक मिडिया (२४ करोड ९६ लाख) क्रमशः दोस्रो र तेस्रो स्थानमा रहे ।
