म्याग्दी । पूर्वी क्षितिजमा लाली चढ्दै गर्दा म्याग्दीको पुनहिल पर्यटकले भरिन थाल्छ। कोही क्यामेरामा दृश्य कैद गर्न व्यस्त हुन्छन् त कोही मोबाइलमा सूर्योदयको सुन्दरता समेटिरहेका हुन्छन्। चराचुरुङ्गीको चिरबिरसँगै विस्तारै खुल्दै जाने हिमालमा सूर्यको पहिलो किरण पर्दा सेता हिमशृङ्खला सुनौलो रङमा चम्किन्छन्। प्रकृतिको यही अनुपम दृश्यले पर्यटकलाई मन्त्रमुग्ध बनाउँछ।
मनसुन सकिएसँगै खुलेको नीलो आकाश, लहरै देखिने हिमाल र चिसो मौसमले म्याग्दीको अन्नपूर्ण गाउँपालिका–६ स्थित घोडेपानी–पुनहिल क्षेत्रमा पर्यटकको चहलपहल बढाएको छ। दसैँ–तिहारको बिदा मनाउन र प्रकृतिसँग रमाउन चाहने आन्तरिक तथा बाह्य पर्यटकको रोजाइमा यो गन्तव्य पर्न थालेको हो।
दसैँअघि सुनसान बनेको घोडेपानी–पुनहिलमा पछिल्ला दिनमा पर्यटकको आगमन बढ्न थालेको घोडेपानीका होटल व्यवसायीसमेत रहेका अन्नपूर्ण गाउँपालिकाका पूर्वअध्यक्ष डमबहादुर पुनले बताए।
“विपद्का कारण असोज महिनामा सुनसान भएको थियो,” उनले भने, “कात्तिक महिनाको सुरुवातसँगै दैनिक दुई सय जना विदेशी र ५० जनाको हाराहारीमा नेपाली पर्यटक आउन थालेका छन्।”
पोखराबाट घुम्न आएका सन्तोष बरालले घोडेपानी–पुनहिलको प्राकृतिक सौन्दर्यले आफूलाई मोहित बनाएको बताए। सहरको व्यस्त दैनिकीबाट केही समय टाढा रहेर हिमाल, वनजङ्गल र शान्त वातावरणमा रमाउन पाउँदा आनन्द लागेको उनको भनाइ छ। चाडपर्वको बिदालाई घुमफिर र नयाँ अनुभवका लागि उपयोग गर्ने चलन बढ्दै गएको उनले बताए।
समुद्री सतहबाट तीन हजार २१० मिटर उचाइमा रहेको पुनहिल घोडेपानीको प्रमुख आकर्षण हो। यहाँबाट धौलागिरि, अन्नपूर्ण, नीलगिरि, गुर्जा, मानापाथी, माछापुच्छ्रे, मनास्लु र बराह शिखरसहित १५ भन्दा बढी हिमाली टाकुराको अवलोकन गर्न सकिन्छ।
मौसम खुलेका बेला टाढाटाढासम्म फैलिएका हिमशृङ्खला आँखैअघि उभिएझैँ देखिने स्थानीय व्यवसायी सुरेश पुनले बताए। सूर्योदयसँगै हिमाली दृश्यावलोकनका लागि पनि पर्यटक पुनहिल पुग्ने गर्छन्।
बिहान पुनहिलबाट सूर्योदयको दृश्यावलोकन गरेपछि पर्यटक घोडेपानी फर्केर आसपासका वनजङ्गल, गाउँबस्ती र प्राकृतिक सम्पदाको अवलोकन गर्छन्। शान्त वातावरण र हरियालीले यात्राको थकान बिर्साउन सहयोग गर्ने पोखराकी रोजी श्रेष्ठले बताइन्।
“बिहान हिमालमा उदाउने सूर्य, दिनभरि देखिने हिमशृङ्खला र प्रकृतिको शान्त वातावरणले लोभ्यायो,” उनले भनिन्, “प्रकृतिप्रेमीका लागि घोडेपानी–पुनहिल चाडपर्वको बिदा मनाउन र छोटो पदयात्रा गर्न उपयुक्त गन्तव्य हो।”
घोडेपानीका होटल व्यवसायी टेकसर बुद्धुजा पुनका अनुसार पर्यटकको आगमन बढेसँगै होटल व्यवसायी व्यस्त हुन थालेका छन्। उनका अनुसार घोडेपानीमा दैनिक करिब एक हजार जनालाई बास बसाउन सक्ने क्षमताका २५ वटा सुविधायुक्त होटल छन्।
चाडपर्वको बिदा र अनुकूल मौसमका कारण आगामी दिनमा पर्यटकको सङ्ख्या अझै बढ्ने अपेक्षा गरिएको उनले बताए।
पदयात्रा पर्यटनका लागि विश्वप्रसिद्ध अन्नपूर्ण चक्रीय पदमार्गमा पर्ने घोडेपानी–पुनहिल छोटो अवधिको पदयात्राका लागि पनि लोकप्रिय छ। पोखराबाट कास्कीको नयाँपुल हुँदै उल्लेरीको बाटो पदयात्रा गरेर यहाँ पुग्न सकिन्छ। त्यसैगरी म्याग्दीको पोखरेबगर, घार र शिख हुँदै सडकमार्गबाट पनि घोडेपानी पुग्न सकिन्छ। घोडेपानीबाट करिब आधा घण्टा पैदल हिँडेपछि पुनहिल पुगिन्छ।
पर्यटक पथप्रदर्शक सुन्दर बन्जाराका अनुसार यहाँको मुख्य आकर्षण हिमाली दृश्य र सूर्योदय हो। अनुकूल मौसममा एउटै स्थानबाट धेरै हिमालको अवलोकन गर्न पाइने भएकाले पर्यटक घोडेपानी–पुनहिलप्रति आकर्षित हुने गरेका छन्।
घोडेपानी र पुनहिलको पर्यटन इतिहास पनि रोचक छ। कुनै समय स्थानीय किसानको चरन क्षेत्र रहेको लुङटुङ डाँडा अहिले पुनहिलका नामले विश्व पर्यटन बजारमा परिचित छ। भारतीय सेनाबाट सेवा निवृत्त स्वर्गीय मेजर टेकबहादुर पुनले यस डाँडाको नामकरण गरी पर्यटन विकासको जग बसालेको बताइन्छ। उनको स्मृतिमा पुनहिलमा दृश्यावलोकनस्थलसमेत निर्माण गरिएको छ।
अन्नपूर्ण संरक्षण क्षेत्र आयोजनामा समेटिएपछि यस क्षेत्रको प्रचारप्रसार अन्तर्राष्ट्रियस्तरमा विस्तार भएको हो। प्राकृतिक सौन्दर्य, हिमाली दृश्य, जैविक विविधता र स्थानीय संस्कृति यहाँका थप आकर्षण हुन्।
पछिल्लो समय विभिन्न क्षेत्रमा आएको बाढीपहिरोले नेपालको पर्यटन क्षेत्रमा असर पारे पनि घोडेपानी–पुनहिल, घान्द्रुक र अन्नपूर्ण आधार शिविर क्षेत्रमा प्रत्यक्ष असर नपरेको पर्यटन व्यवसायीले बताएका छन्।
विपद्बाट प्रभावित क्षेत्रका घटनाका कारण समग्र नेपालको पर्यटन असुरक्षित रहेको सन्देश जान नदिन सुरक्षित गन्तव्यको वास्तविक अवस्था प्रचारप्रसार गर्नुपर्ने उनीहरूको भनाइ छ। अनुकूल मौसममा हिमालको मनोरम दृश्य, सूर्योदय र शान्त वातावरणको अनुभव लिन चाहने पर्यटकका लागि घोडेपानी–पुनहिल आकर्षक गन्तव्यका रूपमा रहेको छ।
