काठमाडौं । इरानमा अमेरिकी आक्रमणपछिको तनावका कारण सोमबार एसियाली बजारमा गिरावट आएको छ भने अन्तर्राष्ट्रिय बजारमा तेलको मूल्य पाँच महिनाको उच्च बिन्दुमा पुगेको छ। अमेरिका र इजरायलले इरानका आणविक स्थलहरूमा संयुक्त आक्रमण गरेपछि ऊर्जा आपूर्तिमा अवरोधको चिन्ताले बजारमा दबाब परेको हो।
इरान विश्वको नवौँ ठूलो तेल उत्पादक राष्ट्र हो, जसले दैनिक ३.३ मिलियन ब्यारेल तेल उत्पादन गर्छ। यसमध्ये करिब आधा मात्र निर्यात गरिन्छ भने बाँकी घरेलु खपतमा प्रयोग हुन्छ। विश्लेषकहरूका अनुसार इरानले स्ट्रेट अफ होरमुज बन्द गर्ने निर्णय लिएमा विश्वव्यापी ऊर्जा आपूर्तिमा गम्भीर असर पर्नेछ।
ब्रेन्ट क्रूडको मूल्य २.७ प्रतिशतले वृद्धि भई प्रति ब्यारेल ७९.१२ डलर पुगेको छ भने अमेरिकी क्रूड २.८ प्रतिशतले बढेर ७५.९८ डलरमा कारोबार भएको छ।
बजारमा देखिएको तनावले टोकियोको निक्केई सूचकांक ०.६ प्रतिशतले, सियोलको सूचकांक १.४ प्रतिशतले र सिड्नी ०.७ प्रतिशतले घटेको छ। जापान बाहेकको एशिया–प्रशान्त क्षेत्रको एमएससीआई सूचकांक पनि ०.५ प्रतिशतले ओरालो लागेको छ। यसबीच अमेरिकी बजारले भने सापेक्षिक स्थिरता कायम राखेको छ।
