काठमाडौं । वेस्ट इन्डिजका अलराउन्डर फेबियन एलेन नेपाल प्रिमियर लिग (एनपीएल) को तेस्रो संस्करणका लागि सुदूरपश्चिम रोयल्समा अनुबन्ध भएका छन्। आक्रामक ब्याटिङ र स्पिन बलिङमा क्षमता भएका ३१ वर्षीय एलेनको आगमनले टोलीको तल्लो क्रमको ब्याटिङ तथा बलिङ थप बलियो हुने अपेक्षा गरिएको छ।
बायाँहाते ब्याटर तथा बायाँहाते स्पिनर एलेन टी-२० क्रिकेटका अनुभवी खेलाडी हुन्। उनले विश्वका विभिन्न फ्रेन्चाइज लिगमा सहभागिता जनाइसकेका छन्।
एलेनले वेस्ट इन्डिजका लागि २० एकदिवसीय अन्तर्राष्ट्रिय र ४२ टी-२० अन्तर्राष्ट्रिय खेल खेलेका छन्। एकदिवसीय क्रिकेटमा उनले २०० रन बनाउनुका साथै सात विकेट लिएका छन्। टी–२० अन्तर्राष्ट्रियमा उनको नाममा २९८ रन र २४ विकेट छ।
सबैखाले टी-२० क्रिकेटमा एलेनले १७८ खेल खेल्दै १ हजार ६३४ रन बनाएका छन् भने १०९ विकेट लिएका छन्। यस प्रारूपमा उनको ब्याटिङ स्ट्राइक रेट १३९.८९ छ। उनले टी-२० क्रिकेटमा १०६ छक्का प्रहार गरेका छन्।
एलेनले सन् २०१६ मा जमैकाबाट प्रथम श्रेणी क्रिकेटमा पदार्पण गरेका थिए। सन् २०१८ मा भारत भ्रमणका क्रममा उनले वेस्ट इन्डिजको एकदिवसीय र टी-२० अन्तर्राष्ट्रिय टोलीमा स्थान बनाएका थिए। सन् २०२२ को सुरुवातमा व्यक्तिगत कारणले केही समय क्रिकेटबाट टाढिएका उनी सोही वर्ष अगस्टमा पुनः मैदानमा फर्किएका थिए।
त्यसपछि वेस्ट इन्डिजको राष्ट्रिय टोलीबाट सीमित अवसर पाएका एलेनले क्यारेबियन क्षेत्रसहित संयुक्त अरब इमिरेट्स (यूएई), दक्षिण अफ्रिका, क्यानडा, पाकिस्तान, भारत, श्रीलंका र बंगलादेशका विभिन्न टी-२० लिगमा खेलेका छन्।
सुदूरपश्चिम रोयल्सका प्रमुख कार्यकारी अधिकृत प्रकाश खड्काले एलेनको आगमनले टोलीको स्पिन बलिङ र तल्लो क्रमको ब्याटिङलाई थप बलियो बनाउने विश्वास व्यक्त गरे।
“फेबियन एलेन अनुभवी टी-२० खेलाडी हुन्। उनको अलराउन्ड क्षमताले टोलीलाई बलियो बनाउने विश्वास लिएका छौँ। विशेषगरी स्पिन बलिङ र तल्लो क्रममा आक्रामक ब्याटिङ गर्न सक्ने उनको क्षमताबाट टोलीले फाइदा लिने अपेक्षा गरेका छौँ,” खड्काले भने।
टोलीमा अनुबन्ध भएपछि एलेनले सुदूरपश्चिम रोयल्सबाट एनपीएल खेल्न आफू उत्साहित रहेको बताए।
“सुदूरपश्चिम रोयल्सको हिस्सा बन्न पाउँदा खुसी छु। नेपालमा आएर एनपीएल खेल्न र टोलीको सफलतामा योगदान दिन उत्साहित छु। समर्थकहरूका अगाडि राम्रो प्रदर्शन गर्ने प्रयास गर्नेछु,” उनले भने।
