काठमाडौं । अर्जेन्टिनाका कप्तान तथा विश्व फुटबलका महान् खेलाडी लियोनल मेसीले अन्तर्राष्ट्रिय फुटबलबाट भावुक बिदाइ लिएका छन् । आफ्नो अन्तिम अन्तर्राष्ट्रिय खेलमा एक गोल र दुई असिस्ट गर्दै मेसीले अर्जेन्टिनालाई बेनिनमाथि ३–० को सहज जित दिलाए । ब्युनस आयर्सस्थित मोनुमेन्टल स्टेडियममा ८५ हजारभन्दा बढी दर्शकको उपस्थितिमा ३९ वर्षीय मेसीले २१ वर्ष लामो अन्तर्राष्ट्रिय करियरको अन्तिम खेल खेलेका हुन् ।
अर्जेन्टिनाका लागि यो मेसीको २०८औँ अन्तर्राष्ट्रिय खेल थियो । खेलको १०औँ मिनेटमा उनको प्रसिद्ध १० नम्बरको जर्सीको सम्मानमा एक मिनेट ताली बजाइएको थियो । उक्त क्षणमा मेसी भावुक बनेका थिए ।
खेलमा भेट्रान डिफेन्डर निकोलस ओटामेन्डीले अर्जेन्टिनाका लागि पहिलो गोल गरे । त्यसमा मेसीले असिस्ट गरेका थिए । त्यसपछि निको पाजले दोस्रो गोल गरे । मेसीले खेलको ७१औँ मिनेटमा पेनाल्टीमार्फत गोल गर्दै आफ्नो अन्तर्राष्ट्रिय गोल संख्या १२६ पुर्याए ।
मेसीको अन्तिम खेललाई अर्जेन्टिनामा ‘द लास्ट ट्याङ्गो’ नाम दिइएको थियो । खेलअघि नै उनी भावुक देखिएका थिए । स्टेडियम पुग्ने क्रममा समर्थकहरूले भरिएको सडकमा अर्जेन्टिनी टोलीको बस अघि बढ्दा मेसीले आँसु पुछिरहेका थिए ।
मैदान प्रवेश गर्दा मेसी आफ्ना तीन सन्तानसँगै थिए । उनकी पत्नी एन्टोनेला रोकुज्जो र आमा सेलिया कुक्चिटिनीले भीआईपी बक्सबाट उनलाई हात हल्लाउँदै बिदाइ गरे ।
खेल सुरु हुनुअघि मैदानमा मेसीको १० नम्बरको जर्सीसहित ‘धन्यवाद’ लेखिएको विशाल अर्जेन्टिनी जर्सी राखिएको थियो । त्यसपछि स्टेडियममा उपस्थित हजारौँ समर्थकले मेसीको सम्मानमा ठूलो आवाजमा जयजयकार गरेका थिए ।
फकल्यान्ड युद्धका पूर्वसैनिक फाबियो सान्तानाले राष्ट्रिय गान गाइरहँदा मेसी पुनः भावुक देखिए । सो अवसरमा ‘द माल्भिनास आर अर्जेन्टाइन’ लेखिएको ब्यानरसमेत प्रदर्शन गरिएको थियो ।
खेल सकिएपछि स्टेडियममाथिको आकाशमा ड्रोन शो आयोजना गरिएको थियो । ड्रोनमार्फत मेसीको आकृति बनाउँदै आठपटकका बालोन डी’ओर विजेतालाई उनको अतुलनीय करियरका लागि धन्यवाद दिइएको थियो ।
मेसीको अन्तर्राष्ट्रिय बिदाइ अर्जेन्टिनाले स्पेनसँग विश्वकपको फाइनलमा १–० को हार बेहोरेको करिब साढे दुई महिनापछि भएको हो । अमेरिकाको न्यु जर्सीमा भएको उक्त खेलपछि मेसी आँसु झार्दै मैदानबाट बाहिरिएका थिए ।
त्यसपछि मेसीले आफूले अर्जेन्टिनाका लागि आफ्नो सम्पूर्ण क्षमता दिएको बताएका थिए । ‘मैले आफ्नो सबै दिएँ । अब दिनका लागि मसँग केही बाँकी छैन । साथै, उत्कृष्ट युवा खेलाडीहरू आइरहेका छन्, उनीहरूले आफ्नो अवसर पाउनुपर्छ,’ उनले त्यतिबेला भनेका थिए ।
अन्तिम खेलअघि ब्युनस आयर्स विश्वविद्यालयले अर्जेन्टिना फुटबल संघ (एएफए) को मुख्यालयमा आयोजित समारोहमा मेसीलाई मानार्थ डक्टरेट उपाधि प्रदान गरेको थियो । ‘म मानार्थ डाक्टर हुँ भनेर भन्न पाउनु !’ भन्दै मेसीले ठट्टा गरेका थिए । उनले उक्त सम्मानप्रति गर्वसमेत व्यक्त गरे ।
एएफए मुख्यालयबाहिर समर्थकहरूले मेसीको तस्बिरसहितको विशाल अर्जेन्टिनी झण्डा प्रदर्शन गरेका थिए । झण्डामा ‘द जोय अफ माइ लाइफ’ अर्थात् ‘मेरो जीवनको खुसी’ लेखिएको थियो ।
मेसीले अर्जेन्टिनालाई सन् २०२२ को विश्वकप जिताउँदै ३६ वर्षपछि देशलाई विश्वकप उपाधि दिलाएका थिए । त्यससँगै उनी अर्जेन्टिनाका महान् खेलाडी डिएगो म्याराडोनाका उत्तराधिकारीका रूपमा स्थापित भएका थिए ।
मेसीको अन्तर्राष्ट्रिय करियरमा अर्जेन्टिनाले एकपटक विश्वकप जितेको छ । अर्जेन्टिना सन् २०१४ र २०२६ मा विश्वकपको उपविजेता बनेको थियो । त्यस्तै, उसले सन् २०२१ र २०२४ मा कोपा अमेरिका उपाधिसमेत जितेको थियो ।
मेसी हाल अमेरिकी क्लब इन्टर मियामीसँग सन् २०२८ सम्मको सम्झौतामा छन् । यद्यपि उनका पिता जर्ज मेसीको दुई महिनाअघि निधन भएपछि उनले व्यावसायिक फुटबलबाट समेत अपेक्षाभन्दा चाँडै बिदा लिन सक्ने संकेत गरेका थिए ।
