काठमाडौं । बलिउडका वरिष्ठ अभिनेता नाना पाटेकरको ७५ वर्षको उमेरमा निधन भएको छ। उनको बिहीबार बिहान गोवास्थित निजी अस्पतालमा निधन भएको भारतीय सञ्चारमाध्यमले जनाएका छन्।
पाटेकरलाई गोवास्थित आफ्नै घरमा गम्भीर छाती दुखाइ भएपछि चिकित्सकीय टोली बोलाइएको थियो। टोली पुग्दा उनी अचेत अवस्थामा भेटिएका थिए। त्यसपछि उनलाई मणिपाल अस्पताल लगिएको थियो। चिकित्सकहरूले करिब ४५ मिनेटसम्म उनलाई सीपीआरमार्फत बचाउने प्रयास गरे पनि सफल हुन सकेन। अस्पतालले बिहान ५ः२० बजे उनको मृत्यु भएको घोषणा गरेको थियो।
चिकित्सक डा. शेखर सालकरका अनुसार पाटेकरको मृत्यु गम्भीर हृदयाघातका कारण भएको हो। उनको मृत्युबारे मेडिको–लिगल केस (एमएलसी) दर्ता गरिएको छ। पोस्टमार्टमपछि मात्र शव परिवारलाई बुझाइनेछ। पोस्टमार्टमका लागि उनको शव गोवा मेडिकल कलेज लगिएको छ।
भारतीय चलचित्रका प्रभावशाली अभिनेताका रूपमा परिचित पाटेकरले हिन्दी र मराठी चलचित्रमा करिब पाँच दशक लामो यात्रा तय गरेका थिए। उनले १९७८ मा ‘गमन’बाट हिन्दी चलचित्रमा पदार्पण गरेका थिए। त्यसपछि ‘अंकुश’, ‘परिन्दा’, ‘क्रान्तिवीर’, ‘अग्निसाक्षी’, ‘अब तक छप्पन’, ‘राजनीति’, ‘वेलकम’लगायत चलचित्रमा प्रभावशाली अभिनय गरेका थिए।
१९८९ को ‘परिन्दा’मा अन्नाको भूमिका निर्वाह गरेबापत उनले सर्वश्रेष्ठ सहायक अभिनेताको राष्ट्रिय चलचित्र पुरस्कार जितेका थिए। त्यसपछि १९९४ को ‘क्रान्तिवीर’का लागि सर्वश्रेष्ठ अभिनेताको राष्ट्रिय चलचित्र पुरस्कार तथा १९९६ को ‘अग्निसाक्षी’का लागि सर्वश्रेष्ठ सहायक अभिनेताको राष्ट्रिय चलचित्र पुरस्कार प्राप्त गरेका थिए। यससँगै उनको राष्ट्रिय चलचित्र पुरस्कारको संख्या तीन पुगेको थियो।
पाटेकरले अभिनयसँगै निर्देशनमा पनि हात हालेका थिए। उनले १९९१ मा ‘प्रहार : द फाइनल अट्याक’ निर्देशन गरेका थिए। सामाजिक कार्यमा समेत सक्रिय उनले महाराष्ट्रका किसानका समस्यामा काम गर्ने ‘नाम फाउन्डेसन’ स्थापनामा योगदान दिएका थिए। उनी भारतीय सेनाको टेरिटोरियल आर्मीसँग समेत आबद्ध थिए र मानार्थ लेफ्टिनेन्ट कर्नेलको पद पाएका थिए।
भारतीय चलचित्र क्षेत्रमा पुर्याएको योगदानका लागि उनलाई सन् २०१३ मा पद्मश्रीबाट सम्मानित गरिएको थियो। पछिल्लो समय पनि उनी चलचित्रमा सक्रिय थिए। उनका पछिल्ला चलचित्रमा ‘वनवास’ (२०२४), ‘हाउसफुल ५’ (२०२५), ‘ओ’ रोमियो’ र ‘सुबेदार’ (२०२६) रहेका छन्।
