काठमाडौँ, असोज १९ गते । संविधानसभा सदस्य एवं नेपाली कांग्रेसका नेता रञ्जीत कर्णले पार्टीको महामन्त्री पदमा उम्मेदवारी घोषणा गरेका छन्। काठमाडौँमा जारी कांग्रेसको १५औँ महाधिवेशनअन्तर्गत सोमबार पत्रकार सम्मेलन गर्दै नेपाल विद्यार्थी संघका पूर्वअध्यक्षसमेत रहेका कर्णले महामन्त्री पदमा उम्मेदवारी घोषणा गरेका हुन्।
कर्णले कांग्रेस कमजोर नभए पनि पार्टीभित्रको संगठनात्मक ऊर्जा कमजोर भएको बताएका छन्। उनले पार्टीको विचारलाई नयाँ पुस्तासँग जोड्ने प्रयास कमजोर भएको र नयाँ पुस्तालाई नेतृत्वमा ल्याउने पर्याप्त अवसर सिर्जना हुन नसकेको दाबी गरे।
‘कांग्रेससँग विचारको इतिहास छैन भन्ने होइन, त्यो विचारलाई अहिलेको पुस्तासँग जोड्ने प्रयास कमजोर भएको हो। कांग्रेससँग नेता छैनन् भन्ने होइन, नयाँ पुस्तालाई नेतृत्वमा ल्याउने ढोका पर्याप्त खुला छैन। त्यसैले महामन्त्रीको पद माग्न मात्र आएको होइन, कांग्रेसभित्र एउटा नयाँ बहस सुरु गर्न आएको हुँ,’ उनले भने।
कर्णले कांग्रेसको संगठनलाई पुनर्जीवित गर्ने, कार्यकर्तालाई अधिकार र जिम्मेवारीसँग जोड्ने, नयाँ पुस्तालाई नेतृत्वको साझेदार बनाउने तथा पार्टीलाई जनताको विश्वासको केन्द्रमा पुनः स्थापित गर्ने उद्देश्यले महामन्त्रीमा उम्मेदवारी दिएको बताए।
उनले पार्टीभित्रै प्रश्न गरेर समीक्षा गर्ने समय आएको उल्लेख गर्दै कांग्रेसको सदस्यता संख्या विस्तारमा मात्र सीमित हुन नहुने धारणा राखे।
‘कांग्रेसको सदस्यता किन संख्या मात्र बनिरहेको छ? कार्यकर्ता किन निर्णयको साझेदार होइन, निर्देशनको पर्खाइमा बस्नुपर्ने अवस्थामा छन्? नयाँ पुस्ता कांग्रेससँग जोडिन चाहँदा हामीले उसलाई कति ठाउँ दिएका छौँ? र कांग्रेसको संगठन जनताको जीवनसँग कति जोडिएको छ? यी सबै प्रश्नको जवाफ बोकेर महामन्त्री पदमा उम्मेदवारी घोषणा गरेको छु,’ कर्णले भने।
उनले आफ्नो उम्मेदवारी कुनै व्यक्तिविरुद्ध नभई पार्टीभित्रको प्रवृत्तिविरुद्ध भएको स्पष्ट पारे। बलियो संगठन निर्माण, विचारमा स्पष्टता, संगठनमा सक्रियता, नेतृत्वमा लोकतान्त्रिक अभ्यास, आचरणमा अनुशासन तथा जनतासँग जोडिएको विश्वसनीय कांग्रेस निर्माणका लागि कार्यशैली परिवर्तन गर्ने आफ्नो प्रतिबद्धता रहेको उनले बताए। कांग्रेस महामन्त्री पदमा वर्तमान महामन्त्रीद्वय गुरुराज घिमिरे र प्रदीप पौडेलसहित १० जनाभन्दा बढीले उम्मेदवारी घोषणा गरिसकेका छन्।
