काठमाडौं । नेपाली कांग्रेसका निवर्तमान केन्द्रीय सदस्य एवं उद्यमी विनोद चौधरीले पार्टीको १५औँ महाधिवेशनमा समावेशीतर्फ उपसभापति पदमा उम्मेदवारी दिएका छन् ।
चौधरीले आफ्नो उम्मेदवारीलाई पार्टीको पद प्राप्त गर्ने प्रयासमा मात्र सीमित नराखी आर्थिक विकासका एजेन्डालाई राजनीतिको केन्द्रमा स्थापित गर्ने, युवा पुस्ताका आकांक्षा सम्बोधन गर्ने र नेपाली कांग्रेसलाई समयअनुकूल रूपान्तरण गर्ने अभियानका रूपमा प्रस्तुत गरेका छन् ।
निराशातर्फ उन्मुख नेपाली समाजमा नयाँ आशा र विश्वास सिर्जना गर्नुपर्ने आवश्यकता औँल्याउँदै चौधरीले कांग्रेसले राजनीतिक स्वतन्त्रताको नेतृत्व गरेको आफ्नो गौरवशाली इतिहासलाई आर्थिक क्रान्तिको नेतृत्व गर्ने नयाँ इतिहाससँग जोड्नुपर्ने बताएका छन् ।
त्यसका लागि राजनीति र अर्थनीतिलाई सँगसँगै अघि बढाउँदै बीपी कोइरालाको दूरदर्शी राजनीतिक सोच र सुवर्णशमशेर जबराको आर्थिक विकाससम्बन्धी नीतिलाई संयोजन गर्नुपर्ने उनको धारणा छ ।
चौधरीले पार्टीभित्र युवा नेतृत्वलाई स्थापित गर्ने, अनुभवी नेतृत्वको ज्ञान र नयाँ पुस्ताको ऊर्जालाई जोड्ने तथा पुस्तान्तरण र पुस्ताबीचको सहकार्यबाट आधुनिक कांग्रेस निर्माण गर्ने विषयलाई आफ्नो उम्मेदवारीको प्रमुख आधार बनाएका छन् ।
सभापति गगनकुमार थापाले अघि सारेको ‘समुन्नत नेपाल’ निर्माणको सोचलाई व्यवहारमा कार्यान्वयन गर्न आफूले भूमिका खेल्ने उनको एजेन्डामा उल्लेख छ ।
चौधरीका प्रमुख एजेन्डा
निराशातर्फ उन्मुख नेपाली समाजमा नयाँ आशा र विश्वास सिर्जना गर्ने ।
नेपाली कांग्रेसको नेतृत्वमा युवा नेतालाई स्थापित गर्ने ।
राजनीतिक स्वतन्त्रताको नेतृत्व गरेको कांग्रेसलाई आर्थिक क्रान्तिको नेतृत्व गर्ने पार्टीका रूपमा स्थापित गर्दै नयाँ इतिहास लेख्ने ।
राजनीति र अर्थनीतिलाई सँगसँगै अघि बढाउने ।
बीपी कोइरालाको दूरदर्शी राजनीतिक सोच र सुवर्णशमशेर जबराको आर्थिक विकाससम्बन्धी नीतिलाई संयोजन गर्दै कांग्रेसलाई नयाँ उचाइमा पुर्याउने ।
