काठमाडौं । रसुवामा आएको विनाशकारी बाढीका कारण तीन दिनसम्म अवरुद्ध रहेको यातायात सेवा अहिले क्रमशः सहज बन्दै गएको छ।
काठमाडौँ–मुग्लिङ सडकखण्डको अधिकांश भागमा अहिले पूर्ण रूपमा सवारीसाधन सञ्चालनमा आएका छन्। तर धादिङको बैरेनी बजार क्षेत्रमा करिब एक किलोमिटर सडकखण्डमा भने एकतर्फी रूपमा मात्रै यातायात सञ्चालन भइरहेको प्रहरीले जनाएको छ।
भदौ १० गते भोटेकोशी नदीमा आएको बाढीपछि विभिन्न स्थानमा पहिरो खस्नुका साथै सडकमा लेदो, काठपात तथा अन्य अवशेष थुप्रिएपछि काठमाडौं उपत्यका जोड्ने प्रमुख सडकमार्ग प्रभावित भएको थियो।
सडक विभाग र सुरक्षाकर्मीले निरन्तर अवरोध हटाउँदै गएपछि अहिले अधिकांश सडकमा यातायात सञ्चालनमा आएको हो।
बैरेनी बजार क्षेत्रमा सडक मर्मत तथा व्यवस्थापनको काम जारी रहेकाले करिब एक किलोमिटर सडकमा एकतर्फी यातायात सञ्चालन गरिएको प्रहरीले जनाएको छ।
यात्रुलाई सडकको अवस्था बुझेर सावधानीपूर्वक यात्रा गर्न प्रहरीले आग्रह गरेको छ।
