भूमिहीन दलित, सुकुमबासी र अव्यवस्थित बसोबासीका लागि ३५ दिने अन्तिम सूचना जारी

काठमाडौं। भूमि समस्या समाधान समितिले विभिन्न जिल्लाका भूमिहीन दलित, भूमिहीन सुकुमबासी तथा अव्यवस्थित बसोबासीका लागि जग्गा प्राप्ति तथा व्यवस्थापन प्रक्रियाअन्तर्गत ३५ दिने अन्तिम सूचना जारी गरेको छ।

समितिले सोमबार प्रकाशित सूचनामार्फत तोकिएका स्थानीय तहका लक्षित वर्गलाई निर्धारित समयभित्र निवेदन पेश गर्न आग्रह गरेको हो। सरकारको भूमिहीन दलित र सुकुमबासीलाई जग्गा उपलब्ध गराउने तथा अव्यवस्थित बसोबासीको व्यवस्थापन गर्ने कार्यक्रमअनुसार यो प्रक्रिया अघि बढाइएको समितिले जनाएको छ।

यसरी दिन सकिन्छ निवेदन

योग्यता पुगेका व्यक्तिले समितिले तोकेको ढाँचाअनुसारको निवेदन फाराम भरेर साउन ४ गतेदेखि ३५ दिनभित्र सम्बन्धित स्थानीय तहका वडामा खटिएका लगत सङ्कलकमार्फत पेश गर्नुपर्नेछ।

समितिका अनुसार, लगत सङ्कलनको दोस्रो सूचना प्रकाशित भइसकेका स्थानीय तहका लागि भने यो अन्तिम अवसर हुनेछ।