काठमाडौँ । नेपाल महिला राष्ट्रिय फुटबल टोली ले आज साफ महिला च्याम्पियनसिप अन्तर्गत भुटानसँग खेल्दै प्रतियोगिताको सुरुआत गर्दैछ। समूह ‘ए’ अन्तर्गत हुने खेलमा दुवै टोली विजयी सुरुआत गर्ने लक्ष्यमा छन्।
नेपाल प्रतियोगिताको अहिलेसम्म ६ पटक उपविजेता बनेको टोली हो। नेपालले सन् २०१०, २०१२, २०१४, २०१९, २०२२ र २०२४ संस्करणमा फाइनल पुगेर पनि उपाधि जित्न सकेको थिएन।
यता भुटान महिला राष्ट्रिय फुटबल टोली ले भने हालसम्म सेमिफाइनलभन्दा माथिल्लो उपलब्धि हासिल गर्न सकेको छैन। भुटान सन् २०२२ र २०२४ मा सेमिफाइनलसम्म पुगेको थियो।
साफ महिला च्याम्पियनसिपमा नेपालले भुटानविरुद्ध हालसम्म हार बेहोरेको छैन। दुई टोलीबीच भएका पाँच खेलमध्ये नेपालले चार खेल जितेको छ भने एक खेल बराबरीमा सकिएको थियो। नेपालले भुटानविरुद्ध २३ गोल गरेको छ भने अहिलेसम्म कुनै गोल खाएको छैन।
दुवै टोली पहिलोपटक सन् २०१४ मा आमनेसामने भएका थिए। त्यस खेलमा नेपालले ८-० को फराकिलो जित निकालेको थियो। त्यसपछि सन् २०१६ मा ६-०, २०१९ मा ३-० तथा २०२२ मा ४-० को जित नेपालले दर्ता गरेको थियो।
सन् २०२४ को पछिल्लो संस्करणमा भने नेपाल र भुटानबीचको खेल गोलरहित बराबरीमा टुंगिएको थियो। नेपाल र भुटानबीचको आजको खेल जवाहरलाल नेहरू रंगशाला मा नेपाली समयअनुसार दिउँसो ४ः४५ बजे सुरु हुनेछ।
