काठमाडौं। प्रधानमन्त्री केपी ओलीको आज ६९ औं जन्मदिन परेको छ। प्रधानमन्त्री आफ्नो ६९औँ जन्मदिन मनाउन जन्मथलो तेह्रथुम जाँदैछन् । ओली २००८ साल फागुन ११ मा तेह्रथुमको साविक इवा गाविसको सल्ले (हाल अठराई गाउँपालिका–४) मा जन्मेका थिए। ओलीले आफ्ना पिता मोहनप्रसादले २०२४ सालमा बेचेको गाँउको घरमै जन्मदिन मनाउने तयारी छ ।
बुवाले साढे ११ हजार रुपैयाँमा बेचेको उक्त घर ओलीले २०७२ सालमा आफ्नो नाममा फिर्ता लिएका थिए । हाल उक्त घर खालि अवस्थामा रहेको छ । ओलीले जन्मदिनमा आफ्ना गाँउका जेष्ठ नागरिकलाई सम्मान गर्ने र विद्यार्थीलाई शैक्षिक सामग्री वितरण गर्ने कार्यक्रम समेत रहेको जनाइएको छ ।
जन्मदिनको अवसरमा आठराई गाउँपालिकामा दुई हजार विद्यार्थीलाई प्रमको तस्बिर र हस्ताक्षरसहितको डायरी र कलम तथा दुई सय वृद्धवृद्धालाई न्यानो कपडा वितरण गर्ने कार्यक्रम रहेको गाउँपालिकाले जनाएको छ ।आठराईमा त्रिभुवन विश्वविद्यालयको एक आङ्गिकसहित दुई वटा क्याम्पस र नौ वटा माविसहित ५८ वटा विद्यालय छन् ।
त्यहाँ प्रधानमन्त्री ओलीले ताप्लेजुङ्गको ढुङ्गेसाँघुमा रहेको मदन भण्डारीको जन्मघरसम्म जोड्ने मोटरबाटोको शिलान्यास गर्ने र नेपाल बैंकको शाखा कार्यालय उद्घाटन गर्ने समेत कार्यक्रम रहेको छ । प्रधानमन्त्रीको जन्मदिन मनाउन तेह्रथुमको आठराई गाउँपालिकामा आइतबार स्थानीय सार्वजनिक बिदा दिइएको छ ।
