काठमाडौं । अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी चिनफिङलाई तीनदिने राजकीय भ्रमणका क्रममा जोइन्ट बेस एन्ड्र्युजमा व्यक्तिगत रूपमा स्वागत गरेका छन्। सी बुधबार अमेरिकाको वासिङ्टन पुगेका हुन्।
ट्रम्प र प्रथम महिला मेलानिया ट्रम्प सी र उनकी पत्नी पेङ लियुआनलाई स्वागत गर्न विमानस्थलको धावनमार्गमा पुगेका थिए। सीका लागि लामो रातो कार्पेट बिछ्याइएको थियो भने सैनिक ब्याण्ड तथा सैन्य सम्मानसहित स्वागत गरिएको थियो।
सीको स्वागतका क्रममा अमेरिकी सैन्य विमानको फ्लाइओभरसमेत गरिएको थियो। ट्रम्पले विमानबाट ओर्लिएका सीसँग हात मिलाउँदै औपचारिक स्वागत गरेका थिए।
अमेरिकी राष्ट्रपतिले विदेशी राष्ट्रप्रमुखलाई विमानस्थलमै पुगेर स्वागत गर्नु दुर्लभ कूटनीतिक प्रचलन मानिन्छ। उपलब्ध विवरणअनुसार जोइन्ट बेस एन्ड्र्युजमा यसअघि यस्तै स्वागत सन् १९६२ मा तत्कालीन राष्ट्रपति जोन एफ. केनेडीले बेलायती प्रधानमन्त्री ह्यारोल्ड म्याकमिलनका लागि गरेका थिए।
सीको तीनदिने भ्रमणका क्रममा व्यापार, प्रविधि, कृत्रिम बुद्धिमत्ता, इरान र ताइवानलगायत विषयमा ट्रम्पसँग छलफल हुने अपेक्षा गरिएको छ। यो स्वागतले अमेरिका–चीन सम्बन्धमा जारी उच्चस्तरीय संवादलाई वासिङ्टनले दिएको महत्त्वसमेत देखाएको अन्तर्राष्ट्रिय सञ्चारमाध्यमहरूले उल्लेख गरेका छन्।
