काठमाडौं । संघीय राजधानी काठमाडौंलाई जोड्ने प्रमुख मुग्लिन-नारायणगढ सडकखण्डमा खसेको पहिरो हटाइएपछि यातायात सेवा पुनः पूर्ण रूपमा सञ्चालनमा आएको छ।बुधबार बिहान चितवनको सिमलताल नजिक पहिरो खस्दा सडक दुवैतर्फ अवरुद्ध भएको थियो। सडक बन्द भएपछि सयौं सवारीसाधन र यात्रु बीच बाटोमै रोकिएका थिए।
सडक अवरुद्ध भएको जानकारी प्राप्त भएपछि सडक डिभिजन भरतपुरले आवश्यक उपकरण र प्राविधिक टोली परिचालन गरी युद्धस्तरमा पहिरो पन्छाउने काम गरेको थियो। मेशिनको सहायताले लेदोसहितको पहिरो हटाएपछि सडक दुवैतर्फ सञ्चालनमा ल्याइएको डिभिजनले जनाएको छ।
सडक खुलेसँगै रोकिएका सवारीसाधन आफ्नो गन्तव्यतर्फ अघि बढ्न थालेका छन्। वर्षायाममा यस सडकखण्डमा बारम्बार पहिरो खस्ने जोखिम रहने भएकाले यात्रा गर्दा सतर्कता अपनाउन सडक डिभिजनले यात्रु तथा चालकलाई आग्रह गरेको छ।
