काठमाडौं। साताको कारोबारको क्रममा धितोपत्र बजारमा सोमबार दोहोरो दबाब देखिएको छ। सेयर बजारको परिसूचक नेप्से २६.२९ अंकले घट्दा कारोबार रकम पनि साढे ३ अर्ब रुपैयाँमा सीमित भएको छ।
नेपाल स्टक एक्सचेञ्ज (नेप्से)का अनुसार आज नेप्से परिसूचक २६.२९ अंकले घटेर २ हजार ६२७.११ बिन्दुमा पुगेको छ। यस्तै, ठूला कम्पनीहरूको कारोबार मापन गर्ने सेन्सेटिभ परिसूचक पनि ३.५३ अंकले घटेर ४५६.२७ बिन्दुमा झरेको छ।
आज ३५६ कम्पनीका ७५ लाख ४० हजार ४१८ कित्ता सेयर तीन अर्ब ५५ करोड ७९ लाख ८१ हजार ४९८ रुपैयाँ बराबरमा खरिद–बिक्री भएको नेप्सेले जनाएको छ।
कारोबार रकमका आधारमा नेपाल इन्भेस्टमेन्ट बैंक ऋणपत्र–२०८४, सेन्ट्रल फाइनान्स, एनआरएन इन्फास्ट्रक्चर एण्ड डेभलपमेन्ट, आँखु खोला जलविद्युत् कम्पनी र ग्लोबल आइएमई बैंक डिबेञ्चर शीर्ष पाँचमा परेका छन्।
त्यस्तै, मूल्यवृद्धिका आधारमा स्नो रिभर लिमिटेड, सानिगाड हाइड्रो, कालङ्गा हाइड्रो, कर्पोरेट डेभलपमेन्ट बैंक र एसबिएल डिबेञ्चरका लगानीकर्ताले सबैभन्दा बढी लाभ कमाएका छन्।
यता, थ्री स्टार हाइड्रोपावर, नेपाल फाइनान्स, खानीखोला हाइड्रोपावर, एनआईबीएल स्टेबल फण्ड र उपकार लघुवित्तका लगानीकर्ताले सबैभन्दा बढी घाटा व्यहोरेका छन्।
आजको कारोबारमा नेप्से परिसूचकसँगै सेन्सेटिभ परिसूचक पनि घटेकाले बजारमा बिक्री दबाब बढेको देखिएको छ। यद्यपि केही जलविद्युत् कम्पनी र डिबेञ्चरमा लगानीकर्ताको आकर्षण कायम रहेको संकेत कारोबार विवरणले देखाएको छ।
