काठमाडौं । राष्ट्रिय सभाले चार वटा अध्यादेश स्वीकृत गरेको छ। शुक्रबार बसेको बैठकले सार्वजनिक खरिद (दोस्रो संशोधन) अध्यादेश, २०८३, सम्पत्ति शुद्धीकरण (मनी लाउण्डरिङ्ग) निवारण (तेस्रो संशोधन) अध्यादेश, २०८३, सहकारी (पहिलो संशोधन) अध्यादेश, २०८३ र स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने अध्यादेश, २०८३ स्वीकृत गरेको हो।
यी अध्यादेशहरू स्वीकृतिका लागि बैठकमा प्रस्तुत भएपछि सभाले बहुमतका आधारमा पारित गरेको बताइएको छ। यसअघि सोही दिन प्रतिनिधिसभाले पनि यही चार अध्यादेश स्वीकृत गरिसकेको थियो।
सरकारले संसद्को चालु अधिवेशन सुरु हुनुअघि आठ वटा अध्यादेश जारी गरेको थियो, जसलाई गत वैशाख २८ गते प्रतिनिधिसभा र राष्ट्रिय सभामा पेश गरिएको थियो। तीमध्ये चार वटा अध्यादेश दुवै सदनबाट स्वीकृत भएसँगै अब तिनलाई प्रतिस्थापन विधेयकमार्फत कानुनी रूप दिन सरकारलाई बाटो खुलेको छ।
राष्ट्रिय सभामा राष्ट्रिय स्वतन्त्र पार्टी (रास्वपा) को उपस्थिति नरहे पनि अध्यादेश स्वीकृत भएपछि सरकारको विधेयक प्रक्रियामा सहजता आएको छ।
