काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्बाङ र महासचिव किरण राई पाँच–पाँच लाख रुपैयाँ धरौटी बुझाएर रिहा भएका छन्। बुधबार बयानपछि ललितपुर जिल्ला अदालतका न्यायाधीश हरिसिंह धामीको इजलासले दुवै जनालाई जनही पाँच लाख रुपैयाँ धरौटीमा रिहा गर्न आदेश दिएको थियो।
अदालतका सूचना अधिकारी टीकाध्वज कार्कीले उनीहरूले धरौटी रकम बुझाएर रिहा भइसकेको जानकारी दिए। ‘उहाँहरू जनही पाँच–पाँच लाख रुपैयाँ धरौटी रकम बुझाएर गइसक्नुभएको छ,’ कार्कीले भने।
खेल मिलेमतो तथा ठगीसम्बन्धी कसुरमा नेपाल प्रहरीको केन्द्रीय अनुसन्धान ब्युरो (सीआईबी) को सिफारिसमा ललितपुर जिल्ला सरकारी वकिल कार्यालयले एन्फा अध्यक्ष नेम्बाङ, महासचिव राई, कोषाध्यक्ष रविन्द्र जोशी र लेखापाल सञ्जीव पाण्डेविरुद्ध मुद्दा दायर गरेको थियो।
यस मुद्दामा कोषाध्यक्ष जोशी र लेखापाल पाण्डे यसअघि नै धरौटीमा रिहा भइसकेका छन्।
