काठमाडौं । हाल देशभर मनसुनी वायुको प्रभाव सक्रिय रहेको जल तथा मौसम पूर्वानुमान महाशाखाले जनाएको छ। महाशाखाका अनुसार मनसुनको न्यूनचापीय रेखा सरदर स्थानको आसपासमा रहेको छ, जसका कारण विभिन्न भागहरूमा बदली मौसम र वर्षाको सम्भावना देखिएको हो।
आज दिउँसो देशभर सामान्यतया बदली रहनेछ। कोशी, वाग्मती, गण्डकी र कर्णाली प्रदेशसहितका पहाडी भूभागमा केही स्थानहरूमा मेघगर्जन र चट्याङसहित हल्कादेखि मध्यम वर्षा हुन सक्ने अनुमान गरिएको छ। तीमध्ये एक-दुई स्थानमा भारी वर्षाको सम्भावनासमेत रहेको महाशाखाले जनाएको छ।
यसैगरी, देशका उच्च पहाडी तथा हिमाली क्षेत्रहरूमा हल्कादेखि मध्यम वर्षा र हिमपातको सम्भावना छ। लुम्बिनी र सुदूरपश्चिम प्रदेशका तराई भूभागमा भने केही स्थानहरूमा हुरी चल्न सक्ने चेतावनी दिइएको छ।
आज राति पनि देशभर आंशिकदेखि सामान्यतया बदली रहनेछ। कोशी प्रदेशका केही स्थान, मधेस प्रदेश र अन्य पहाडी भूभागमा मेघगर्जन, चट्याङसहित हल्कादेखि मध्यम वर्षा हुन सक्ने सम्भावना छ। साथै, उच्च पहाडी तथा हिमाली भेगमा एक-दुई स्थानमा हिमपात हुने सम्भावना रहेको छ।
महाशाखाले सम्भावित वर्षाका कारण बाढी, पहिरो र गेग्र्यान बहावको जोखिम रहेकाले सावधानी अपनाउन आग्रह गरेको छ। सहरी तथा तराई क्षेत्रका नागरिकलाई डुबानको सम्भावना भएकाले सतर्क रहन अनुरोध गरिएको छ।
