काठमाडौं। टिकटकको मातृ कम्पनी बाइटडान्सले थाइल्यान्डमा डाटा सेन्टर निर्माणका लागि ८.८ अर्ब अमेरिकी डलर लगानी गर्ने घोषणा गरेको छ। शुक्रबार बैंककमा आयोजित एक कार्यक्रममा टिकटककी सार्वजनिक नीति उपाध्यक्ष हेलेना लेर्शले बाइटडान्सले आउँदो पाँच वर्षभित्र उक्त लगानी गर्ने जानकारी दिएकी हुन्।
थाइल्यान्डको लगानी बोर्डले गत महिनामात्रै बाइटडान्ससँग ३.८ अर्ब डलरको लगानी सम्झौता सार्वजनिक गरेको थियो। तर, हाल घोषणा गरिएको ८.८ अर्ब डलरको लगानी यसअघिको सम्झौतामा समावेश गरिएको थियो वा थिएन भन्ने स्पष्ट छैन।
बाइटडान्सको डाटा सेन्टर निर्माणको योजनाले दक्षिणपूर्वी एसियाली बजारमा कम्पनीको उपस्थितिलाई अझ सशक्त पार्ने अपेक्षा गरिएको छ।
थाइल्यान्डले पछिल्लो समय वैदेशिक प्रविधि कम्पनीहरूलाई आकर्षित गर्दै डिजिटल हबको रूपमा आफूलाई स्थापित गर्ने प्रयास गरिरहेको छ। बाइटडान्सको ठूलो लगानीले देशको प्रविधि क्षेत्रमा नयाँ अवसरहरू सिर्जना गर्ने अनुमान गरिएको छ।
