गुल्मी । रेसुङ्गा विमानस्थलमा यस फागुन महिनाभर कुनै पनि उडान हुने छैन। नेपाल एयरलाइन्सका साना जहाजहरूले यहाँ नियमित उडान गर्दै आएका थिए, तर अहिले यी जहाजमा समस्या देखा परेपछि उडान स्थगन गरिएको हो।
रेसुङ्गा कार्यालयका प्रमुख सुमन थापाका अनुसार, विमानस्थलमा प्रयोग भइरहेका दुई साना जहाजमध्ये एउटा बिग्रिएर मर्मतका लागि काठमाडौँ पठाइएको छ भने अर्को जहाजको इन्जिनमा पनि समस्या आएको छ। थापाले भने, “फागुन महिनाभर उडान हुने सम्भावना छैन, सामग्री विदेशबाट ल्याएर मर्मत गर्न समय बढी लागेको छ।”
रेसुङ्गा विमानस्थलमा २० महिनामा केवल ९० उडान भएको छ। पहिलो उडान २०७९ वैशाखमा भएको थियो, र हालसम्म काठमाडौँ र तम्घासबीचको उडानमा सीमित यात्री सेवा उपलब्ध भएको छ।
विमानस्थलमा अहिले उडान भए पनि कर्मचारी भने मात्र तीन जना कार्यरत छन्।
