काठमाडौं । सामाजिक सञ्जालको प्रयोगलाई व्यवस्थित, मर्यादित र सुरक्षित बनाउन सरकारले ल्याएको सामाजिक सञ्जाल विधेयक, २०८१ आज राष्ट्रियसभामा पेस भएको छ।
आजको राष्ट्रियसभा बैठकमा सञ्चार तथा सूचना प्रविधि मन्त्री पृथ्वीसुब्बा गुरुङले उक्त विधेयक पेस गरे। राष्ट्रियसभा अध्यक्ष नारायणप्रसाद दाहालले विधेयकविरुद्ध कुनै विरोधको सूचना नआएको जानकारी दिइरहँदा विधेयकको मस्यौदा प्रस्तुत गरिएको हो।
सरकारले सामाजिक सञ्जालको सही उपयोग, सामाजिक सद्भाव प्रवद्र्धन, सांस्कृतिक सहिष्णुता र सुशासन कायम गर्न यस विधेयकलाई अघि बढाएको मन्त्री गुरुङले स्पष्ट पारे। विधेयकले सामाजिक सञ्जाल सञ्चालन गर्ने प्लेटफर्म तथा प्रयोगकर्तालाई जिम्मेवार र जवाफदेही बनाउने व्यवस्था गरेको छ।
विधेयकले डिजिटल प्लेटफर्मलाई कानुनी दायरामा ल्याई दुरुपयोग रोक्ने सरकारको प्रयासलाई थप प्रभावकारी बनाउने अपेक्षा गरिएको छ।
