काठमाडौं, ५ जेठ । विश्वभर महामारीकोरुपमा फैलिएको कोरोना भाइरस (कोभिड– १९) संक्रमण रोकथाम तथा नियन्त्रणका लागि सरकारले जारी गरेको लकडाउन जारी छ । आज लकडाउनको ५६ औं दिन हो ।
नेपालमा कोरोना संक्रमितको संख्या बढ्दै गएको र एक जनाको मृत्यु भएपछि आइतबारबाट लकडाउनका कडाई गरिएको छ जसका कारण सडक थप सुनसान बनेको छ ।
सरकारले पटकपटक थप गर्दै लकडाउनलाई जेठ २० गतेसम्म पुर्याएको छ । सर्वसाधारणले नेपाली सेनाको पोसाक लगाएर सवारी चलाउन थालेको पाइएपछि राजधानीका चार स्थान बानेश्वर, महारागन्ज, कालीमाटी र थापाथलीमा सैनिक प्रहरीले चेकिङ सुरु गरेको छ ।
लामो लकडाउनका कारण अर्थतन्त्र प्रभावित भएको भन्दै सरकारले गएको ४२ प्रकारका उद्योग–व्यवसाय सञ्चालन गर्न स्वीकृति दिएको छ । तर उक्त उद्योग–व्यवसाय सञ्चालन गर्न एक तिहाइमात्र कर्मचारी राख्न सकिने व्यवस्था गरिएको छ ।
त्यस्तै काठमाडौं भित्रने नाकामा थप कडाई गरिएको छ भने यसअघि जारी गरिएको पास पनि खारेज गरिएको छ । त्यस्तै जिल्लाभित्र चल्ने सवारीसाधानलाई यसअघि दिइएको पास पनि रद्ध गरिएको छ ।
