मेरो सानो भाइ (बालकविता)

  • 192
    Shares
मेरो सानो भाइ (बालकविता)

– रमेशचन्द्र घिमिरे

बाबा सहर जानुभो
आमा घरमा हुनुहुन्न
खाइदेऊ भात नरोई
खाँदाखेरि रुनुहुन्न

सहरबाट बाबाले
बाजा ल्याइदिने रे !
मेला गई आमाले
खाजा ल्याईदिने रे !

छिन्द्रिङछिन्द्रिङ बाजाको
तालमा नाच्नुपर्छ
लुला खुट्टा उफार्दै
कम्मर भाँच्नुपर्छ

मेलाबाट फर्केर
आमा आएपछि
खुसी हुनुपर्छ है
खाजा खाएपछि

कल-झगडा गर्दैन,
दु:ख दिन्न कसैलाई
बुझ्झकी छ असाध्यै
मेरो सानाे भाइ ।

– भोर्लेटार, लमजुङ