काठमाडौं । प्रधानमन्त्री वालेन्द्र शाहले प्रतिनिधिसभामा दिएको ‘नेपालले पनि भारतको केही भूमि मिचेको’ भन्ने अभिव्यक्तिप्रति विपक्षी दलहरूले कडा आपत्ति जनाएका छन्। उक्त अभिव्यक्ति राष्ट्रिय हितविपरीत रहेको निष्कर्ष निकाल्दै विपक्षी दलहरूले प्रधानमन्त्रीले संसद्मा उपस्थित भएर माफी माग्नुपर्ने माग गरेका छन्।
सोमबार बसेको विपक्षी दलहरूको बैठकले प्रधानमन्त्रीको भनाइबारे विस्तृत छलफल गर्दै उक्त अभिव्यक्ति गलत रहेको ठहर गरेको हो। सिंहदरबारस्थित बैठक करिब एक घण्टा चलेको थियो।
बैठकपछि नेकपाका प्रमुख सचेतक युवराज दुलालले प्रधानमन्त्रीले आफ्नो भनाइ फिर्ता लिनुपर्ने र संसद्मै आएर माफी माग्नुपर्ने निर्णय भएको जानकारी दिए। उनले प्रधानमन्त्रीको अभिव्यक्तिले राष्ट्रिय स्वाभिमानसँग जोडिएको संवेदनशील विषय उठाएकाले त्यसबारे स्पष्ट जवाफ आवश्यक रहेको बताए।
विपक्षी दलहरूले प्रधानमन्त्रीको उक्त भनाइ प्रतिनिधिसभाको अभिलेख (रेकर्ड) बाट हटाउन पनि माग गरेका छन्। उनीहरूको भनाइमा सीमा र राष्ट्रिय अखण्डतासम्बन्धी विषयमा जिम्मेवार पदमा रहेका व्यक्तिबाट तथ्यमा आधारित र सावधानीपूर्वक अभिव्यक्ति आउनुपर्ने हुन्छ।
आइतबार प्रतिनिधिसभामा सांसदहरूको प्रश्नको जवाफ दिने क्रममा प्रधानमन्त्री शाहले नेपालले पनि भारतको भूमि केही स्थानमा अतिक्रमण गरेको हुन सक्ने भन्दै दुवै देशले अध्ययन गरेर समस्याको समाधान खोज्नुपर्ने धारणा व्यक्त गरेका थिए। उक्त अभिव्यक्तिपछि सत्ताबाहिरका राजनीतिक दल तथा विभिन्न नेताहरूले आलोचना गर्दै आएका छन्।
