काठमाडौं । सांसद महावीर पुनले सरकारले विज्ञान, प्रविधि तथा नवप्रवर्तन मन्त्रालय गठन गर्ने निर्णय गरेकोप्रति धन्यवाद व्यक्त गरेका छन् । प्रतिनिधिसभाको बैठकमा बोल्दै उनले उक्त निर्णय सकारात्मक भए पनि मन्त्रालयको नाममा ‘अनुसन्धान’ शब्द समावेश नगरिएकोमा असन्तुष्टि जनाए ।
उनले विज्ञान र प्रविधिको विकास अनुसन्धानसँग प्रत्यक्ष जोडिएको उल्लेख गर्दै मन्त्रालयको संरचना र उद्देश्य अझ स्पष्ट र प्रभावकारी बनाउनुपर्ने धारणा राखे ।
सांसद पुनले आफूलाई माननीयभन्दा पनि विद्यार्थी ठान्ने गरेको बताउँदै यसअघि दिएको ‘श्राप’ फिर्ता लिने घोषणा समेत गरे । उनले नीति तथा कार्यक्रममा पुँजीगत खर्चको कम्तीमा १ प्रतिशत बजेट अनुसन्धान तथा विकास क्षेत्रमा छुट्याउन सरकारसँग आग्रह गरे ।
उनले अनुसन्धान र नवप्रवर्तनमा लगानी नगरी देशले विकासको गति लिन नसक्ने उल्लेख गर्दै युवाहरूलाई विज्ञान र प्रविधिमा आकर्षित गर्ने वातावरण बनाउनुपर्ने बताए ।
सांसद पुनले प्रधानमन्त्री संसद् बैठकमा उपस्थित नहुँदा त्यसले अन्तर्राष्ट्रिय स्तरमा नकारात्मक सन्देश जान सक्ने चिन्ता पनि व्यक्त गरे ।
उनले भने, “प्रधानमन्त्रीज्यू यहाँ आउनुभएन । हामीले पनि उहाँलाई ल्याउन कोसिस गरिरहेका छौँ, अनि उहाँ पनि नआउने कोसिस गरिरहनुभएको छ । यो हाम्रो आन्तरिक कुरा होस् । भोलि यो कुरा इन्टरनेसनल मिडियामा गयो भने के होला भन्ने डर लागेको छ । उहाँले विश्वभर ख्याति प्राप्त गर्नुभएको छ ।”
उनले सरकार र संसदबीच समन्वय तथा संवादलाई अझ प्रभावकारी बनाउन आवश्यक रहेको पनि बताए ।
