काठमाडौं । रुसी राष्ट्रपति भ्लादिमिर पुटिनले युक्रेनसँग शान्तिवार्तामा बस्न तयार रहेको संकेत दिएका छन्। अन्तर्राष्ट्रिय समुदायसँगको संवादमा पुटिनले द्वन्द्वको समाधान वार्तामार्फत खोज्न रूस सधैं इच्छुक रहेको बताएका हुन्। समाचार संस्था रोयटर्सका अनुसार पुटिनको यस अभिव्यक्तिले रूस–युक्रेन युद्धको अन्त्यका लागि कूटनीतिक प्रयासलाई पुनः सक्रिय बनाउने आशा देखिएको छ।
पुटिनले युक्रेन र पश्चिमा मुलुकहरू वार्ताको बाटो रोजे आफू पनि त्यसमा सहभागी हुन तयार रहेको जनाएका छन्। तर, युक्रेनी सरकार र उसका पश्चिमा सहयोगीहरू अझै पनि कडा सर्तमा मात्र वार्तामा बस्न तयार देखिन्छन्।
यद्यपि, युद्धग्रस्त क्षेत्रमा हिंसा यथावत् छ। तर विश्लेषकहरूका अनुसार पुटिनको पछिल्लो अभिव्यक्ति सम्भावित शान्ति प्रक्रियाको खाका बन्न सक्छ।
यसैबीच, अमेरिकी पूर्वराष्ट्रपति डोनाल्ड ट्रम्पले सोमबार रुसविरुद्ध नयाँ करको घोषणा गर्दै युक्रेनलाई थप सैन्य सहायता उपलब्ध गराउने बताएका छन्। ट्रम्पले रूसलाई युद्धविराममा सहमत हुन वा थप प्रतिबन्ध झेल्न ५० दिनको समयसमेत दिएका थिए।
रुस–युक्रेन युद्ध तीन वर्षअघि सुरु भएको हो। यस द्वन्द्वमा अहिलेसम्म ठूलो मानवीय र भौतिक क्षति भइसकेको छ। शान्ति वार्ताका संकेतबीच अहिले अन्तर्राष्ट्रिय समुदायको ध्यान द्वन्द्व अन्त्यतर्फ केन्द्रित भएको छ।
