काठमाडौं। १० खेलाडीमा सीमित भएर पनि उत्कृष्ट संघर्ष गरेको इंग्ल्यान्डले सह–आयोजक मेक्सिकोलाई ३–२ ले पराजित गर्दै फिफा विश्वकप २०२६ को क्वाटरफाइनलमा स्थान सुरक्षित गरेको छ।
एज्टेका स्टेडियममा सम्पन्न अन्तिम १६ को रोमाञ्चक भिडन्तमा दोस्रो हाफको अधिकांश समय एक खेलाडी कम भएर खेले पनि इंग्ल्यान्डले आफ्नो अग्रता कायम राख्दै अन्तिम आठमा स्थान बनायो। यससँगै मेक्सिकोको ४० वर्षयताकै उत्कृष्ट विश्वकप यात्रामा पूर्णविराम लागेको छ।
खेलको सुरुआतदेखि नै आक्रामक बनेको इंग्ल्यान्डका लागि जुड बेलिङहम नायक बने। उनले दुई मिनेटभित्रै दुई गोल गर्दै घरेलु समर्थकलाई स्तब्ध पारे। बेलिङहमले ३६औं मिनेटमा बुकायो साकाको उत्कृष्ट क्रसलाई गोलमा परिणत गर्दै खाता खोले भने ३८औं मिनेटमा ह्यारी केनको पासमा व्यक्तिगत दोस्रो गोल गर्दै इंग्ल्यान्डलाई २–० को बलियो अग्रता दिलाए।
तर पहिलो हाफ सकिनुअघि ४२औं मिनेटमा मेक्सिकोका जुलियन किन्योनेसले रिबाउन्ड बललाई सदुपयोग गर्दै गोल गरेपछि अन्तर २–१ मा झर्यो र घरेलु टोलीले पुनरागमनको आशा जगायो।
दोस्रो हाफमा भिडियो असिस्टेन्ट रेफ्री (भीएआर) को समीक्षा पछि इंग्ल्यान्डका जारेल क्वान्सा रातो कार्ड खाँदै मैदानबाट बाहिरिएपछि इंग्ल्यान्ड १० खेलाडीमा सीमित भयो। संख्यात्मक रूपमा कमजोर बने पनि इंग्ल्यान्डले संयमित प्रदर्शनलाई निरन्तरता दियो।
यसक्रममा एन्थोनी गोर्डनमाथि मेक्सिकाका गोलरक्षक राउल रान्गेलले फाउल गरेपछि इंग्ल्यान्डले पेनाल्टी पायो। त्यस अवसरलाई कप्तान ह्यारी केनले गोलमा परिणत गर्दै टोलीलाई ३–१ को सहज अग्रता दिलाए।
मेक्सिकोले पनि भीएआरको निर्णयपछि पेनाल्टी पायो। ह्यारी केनले ब्रायन गुटिएरेजमाथि फाउल गरेको पुष्टि भएपछि प्राप्त अवसरलाई राउल जिमेनेजले सदुपयोग गर्दै अन्तर ३–२ मा झारे। बाँकी समयमा मेक्सिकोले बराबरी गोलका लागि लगातार दबाब सिर्जना गरे पनि इंग्ल्यान्डको रक्षापंक्तिले उत्कृष्ट प्रदर्शन गर्दै अग्रता जोगायो र क्वाटरफाइनल यात्रा सुनिश्चित गर्यो।
खराब मौसमका कारण एज्टेका स्टेडियम आसपासको अवस्था प्रतिकूल बनेपछि खेल निर्धारित समयभन्दा करिब एक घण्टा ढिलो सुरु गरिएको थियो। अब इंग्ल्यान्डले शनिबार मियामीमा हुने क्वाटरफाइनलमा नर्वेसँग प्रतिस्पर्धा गर्नेछ।
