काठमाडौं। फिफा विश्वकप–२०२६ अन्तर्गत फ्रान्सले इराकमाथि प्रभावशाली जित दर्ता गर्दै नकआउट चरणमा स्थान सुरक्षित गरेको छ। अमेरिकाको फिलाडेल्फिया रंगशालामा सम्पन्न खेलमा फ्रान्सले इराकलाई ३–० गोलअन्तरले पराजित गरेको हो। वर्षाका कारण करिब एक घण्टा खेल स्थगित भए पनि पुनः सुरु भएपछि फ्रान्सले उत्कृष्ट प्रदर्शन गर्दै सहज जित हात पार्यो।
फ्रान्सको जितमा कप्तान किलियन एम्बाप्पेले दुई गोल गरे। उनले खेलको १४औँ मिनेटमा गोल गर्दै टोलीलाई अग्रता दिलाएका थिए। त्यसपछि ५४औँ मिनेटमा व्यक्तिगत दोस्रो गोल गर्दै फ्रान्सको अग्रता दोब्बर बनाए।
फ्रान्सका लागि तेस्रो गोल उस्मान डेम्बेलेले ६६औँ मिनेटमा गरे। विश्वकप प्रतियोगितामा डेम्बेलेको यो पहिलो गोल हो। इराकले खेलभर केही अवसर सिर्जना गरे पनि फ्रान्सको सुदृढ रक्षापंक्ति भेद्न सकेन। फ्रान्सले बल नियन्त्रण र आक्रमण दुवैमा स्पष्ट दबाब कायम राख्दै खेल आफ्नो पक्षमा राख्यो।
यसअघि पहिलो खेलमा फ्रान्सले सेनेगललाई ३–१ ले पराजित गरेको थियो भने इराक नर्वेसँग ४–१ गोलअन्तरले पराजित भएको थियो। लगातार दोस्रो जितसँगै फ्रान्सले समूह चरणमा एक खेल बाँकी रहँदै नकआउट चरणमा प्रवेश गरेको छ। फ्रान्स उपाधि दाबेदार टोलीका रूपमा थप मजबुत देखिएको छ भने इराकको यात्रा भने कठिन बनेको छ।
