काठमाडौं । नेपाली क्रिकेटका लागि खुसीको खबर आएको छ। नेपालका तीन स्टार खेलाडी सन्दीप लामिछाने, दीपेन्द्र सिंह ऐरी र कुशल भुर्तेल श्रीलंकन प्रिमियर लिग (एलपीएल) मा अनुबन्धित भएका छन्। एलपीएल खेलाडी ड्राफ्टमार्फत सन्दीप र दीपेन्द्रलाई जाफ्ना किङ्स ले आफ्नो टोलीमा समावेश गरेको छ भने कुशल भुर्तेललाई कोलम्बो क्याप्स ले खरिद गरेको हो।
स्टार लेग स्पिनर सन्दीप लामिछाने ‘क्लासिक ओभरसिज’ श्रेणीबाट छनोट भएका हुन्। उनलाई जाफ्ना किङ्सले २० हजार अमेरिकी डलर (करिब ३० लाख रुपैयाँ) मा अनुबन्ध गरेको जनाएको छ। यस्तै अलराउन्डर दीपेन्द्र सिंह ऐरी ‘एसोसिएट्स क्याप’ विधाबाट छनोट भएका हुन्। यस श्रेणीको आधार मूल्य १५ हजार अमेरिकी डलर रहेको थियो। अब सन्दीप र दीपेन्द्र एउटै टोलीबाट मैदानमा उत्रिनेछन्।
नेपालका ओपनर तथा अलराउन्डर कुशल भुर्तेललाई कोलम्बो क्याप्सले आफ्नो टोलीमा आबद्ध गरेको छ। कुशलको छनोटसँगै एलपीएलमा नेपाली खेलाडीको उपस्थिति थप बलियो बनेको छ।
जाफ्ना किङ्सको कप्तानी भानुका राजापक्षे ले गर्नेछन्। टोलीमा सकिब अल हसन, इब्राहिम जद्रान, डेभिड विसे, अविष्का फर्नान्डो र दिलशान मधुशंका जस्ता अनुभवी खेलाडी पनि रहेका छन्।
एलपीएलजस्तो प्रतिस्पर्धात्मक फ्रेन्चाइज प्रतियोगितामा तीन नेपाली खेलाडीको छनोट हुनु नेपाली क्रिकेटका लागि महत्वपूर्ण उपलब्धि मानिएको छ। अन्तर्राष्ट्रिय स्तरका खेलाडीसँग ड्रेसिङ रुम साझेदारी गर्ने अवसरले उनीहरूको अनुभव, सीप र आत्मविश्वास थप मजबुत बनाउने विश्वास गरिएको छ। नेपाली समर्थकका लागि अब एलपीएलमा जाफ्ना किङ्स र कोलम्बो क्याप्स विशेष आकर्षणका टोली बन्नेछन्।
