काठमाडौं : गर्मी मौसममा छालामा पसिना, धुलो र घामको प्रभावले गर्दा विभिन्न समस्याहरू देखा पर्न थाल्छन्। टेनिङ, दागधब्बा, पिम्पल र चायाँजस्ता समस्या सामान्य भइरहँदा धेरैले केमिकलयुक्त सौन्दर्य सामग्री प्रयोग गर्दछन्, तर तिनको प्रभाव सधैं प्रभावकारी हुँदैन। यस्ता समस्याको समाधान प्राकृतिक उपायबाट गर्न सकिन्छ, जसमध्ये एलोभेरा सबैभन्दा प्रभावकारी मानिन्छ।
एलोभेरामा पाइने भिटामिन, एन्टिअक्सिडेन्ट र एन्टी–इन्फ्लेमेटरी गुणले छालालाई हाइड्रेट राख्न मद्दत गर्छ। यसले छालालाई शीतलता, ताजापन र प्राकृतिक चमक प्रदान गर्छ। एलोभेरालाई विभिन्न तरिकाले प्रयोग गर्न सकिन्छ, जुन घरमै सजिलै बनाउन सकिने फेस मास्कमार्फत प्रभावकारी हुन्छ।
गर्मीको मौसममा हुने चायाँ, टेनिङ, दाग र झुर्रीको समस्या समाधानका लागि एलोभेरा र मुल्तानी माटोको मास्क निकै लाभदायक हुन्छ।
बनाउने तरिका:
-२ चम्चा मुल्तानी माटो
-२ चम्चा ताजा एलोभेरा जेल
यी दुबैलाई राम्रोसँग मिसाएर अनुहारमा लगाउनुहोस्। १५ मिनेटपछि चिसो पानीले धोएर सफा गर्नुहोस्। यो मास्कले अनुहारलाई चाउरी, कालोपन र घामको असरबाट जोगाउँछ।
एलोभेरा र काक्रोको मास्कले छालालाई शीतलता प्रदान गर्छ र नरम बनाउँछ।
बनाउने तरिका:
-१ चम्चा एलोभेरा जेल
-१ चम्चा काक्रोको रस
यी सामग्रीलाई राम्ररी मिसाएर अनुहारमा लगाउनुहोस् र १५ मिनेटपछि पानीले धुनुहोस्। टेनिङ र छालामा भएको जलन कम गर्न यो निकै प्रभावकारी छ।
एलोभेरा र गुलाबजलको संयोजन छालालाई चम्किलो र ताजगी दिने प्राकृतिक उपाय हो।
बनाउने तरिका:
-१ चम्चा ताजा एलोभेरा जेल
-केही थोपा गुलाबजल
यी सामग्री मिसाएर अनुहारमा लगाउनुहोस्। १५ मिनेटपछि धुने यो उपायले छालामा भएको जलन र तातोपन घटाउँछ।
गर्मीको समयमा छालाको हेरचाह गर्न प्राकृतिक विकल्पहरू जस्तै एलोभेरा, मुल्तानी माटो, काक्रो र गुलाबजल अत्यन्त प्रभावकारी छन्। यिनको नियमित प्रयोगले छालालाई स्वस्थ, नरम र चम्किलो बनाउँछ, र विभिन्न छालासम्बन्धी समस्याबाट छुटकारा पाउन सहयोग पुर्याउँछ।
