काठमाडौं । आज (साउन १३, मंगलबार) देशभरको मौसम बदली रहने र धेरै स्थानमा पानी पर्ने सम्भावना रहेको मौसम पूर्वानुमान महाशाखाले जनाएको छ।
महाशाखाले आज बिहान ६ बजे सार्वजनिक गरेको बुलेटिनअनुसार दिउँसोदेखि रातिसम्म विभिन्न स्थानहरूमा मेघगर्जन र चट्याङसहित वर्षा हुने प्रक्षेपण गरिएको छ।
दिउँसोको समयमा देशभर सामान्यतया आकाश बदली रहनेछ। कोसी, बागमती र लुम्बिनी प्रदेशका पहाडी भू–भागमा धेरै स्थान तथा तराईका केही भागमा मेघगर्जनसहित मध्यम खालको वर्षा हुने सम्भावना छ। विशेषगरी कोसी, बागमती र गण्डकी प्रदेशका पहाडी क्षेत्रमा एक–दुई स्थानमा भारी वर्षा हुन सक्ने चेतावनी दिइएको छ।
आज राति पनि लुम्बिनी प्रदेशलगायत देशका पहाडी भागहरूमा सामान्यतया बादल लाग्नेछ भने तराईका अधिकांश क्षेत्रमा आंशिक बदली रहनेछ। यस्ता क्षेत्रका थोरै स्थानहरूमा र तराईका एक–दुई स्थानमा मेघगर्जन र चट्याङसहित मध्यम वर्षा हुने सम्भावना रहेको महाशाखाले जनाएको छ।
मौसमविद्हरूका अनुसार २४ घण्टाको अवधिमा १० मिलिमिटरभन्दा कम वर्षा ‘हल्का’, १० देखि ५० मिलिमिटर ‘मध्यम’, ५० देखि १०० मिलिमिटर ‘भारी’, १०० देखि २०० मिलिमिटर ‘धेरै भारी’ र २०० मिलिमिटरभन्दा माथिको वर्षा ‘अति भारी’ मानिन्छ।
त्यस्तै, “एक–दुई स्थान” भन्नाले सम्बन्धित प्रदेशको १० प्रतिशतभन्दा कम भूभागमा वर्षा हुने देखिन्छ भने १०–३० प्रतिशतमा ‘थोरै ठाउँ’, ३०–५० प्रतिशतमा ‘केही स्थान’, ५०–८० प्रतिशतमा ‘धेरै स्थान’ र ८० प्रतिशतभन्दा बढी क्षेत्रफलमा वर्षा हुने सम्भावना देखिएमा ‘अधिकांश स्थान’ मा वर्षा हुने भनिन्छ।
महाशाखाले स्थानीयवासी र सरोकारवालालाई आवश्यक सतर्कता अपनाउन आग्रह गरेको छ।
