काठमाडौं । नेकपा (एमाले) का वरिष्ठ उपाध्यक्ष ईश्वर पोखरेलले पार्टीको विधान संशोधन मस्यौदामाथि गम्भीर बहस गर्न पोलिटब्युरो सदस्यहरूलाई सार्वजनिक रूपमा आग्रह गरेका छन्।
शुक्रबार बिहान सामाजिक सञ्जालमार्फत सार्वजनिक अपिल गर्दै उनले पार्टी सचिवालय बैठकमा उक्त मस्यौदामाथि गहन छलफल भइसकेको उल्लेख गरेका छन्। अब पोलिटब्युरो र केन्द्रीय समितिमा समेत परिमार्जनसहित थप छलफल आवश्यक रहेको उनले स्पष्ट पारेका छन्।
पोखरेलले लेखेका छन्, “पार्टीको विधान महाधिवेशनमा प्रस्तुत गरिने संशोधन (मस्यौदा) माथि सचिवालयको बैठकमा गम्भीर छलफल गरियो। आज पोलिटब्युरो सदस्यबीच यो विषयमा विस्तृत बहस हुँदैछ।”
उनले पोलिटब्युरोका सबै सदस्यहरूलाई उत्तरदायित्वपूर्वक सहभागिता जनाउन र मस्यौदालाई अझ प्रभावकारी बनाउन रचनात्मक सुझाव दिन आग्रह गरेका छन्।
पार्टीको विधान परिमार्जनको तयारी महाधिवेशनलाई लक्षित गर्दै गरिएको हो। यसले पार्टीको सांगठनिक संरचना, कार्यशैली तथा नेतृत्व छनोट प्रक्रियामा गम्भीर असर पार्ने विश्वास गरिन्छ।
