काठमाडौं । बुधबार पुनः नेपाली सेयर बजारमा उत्साहजनक वृद्धि देखिएको छ। नेप्से परिसूचक २२.०४ अंकले उकालो लाग्दै २७०५ विन्दुमा पुगेको छ, जसले बजार फेरि २७ सय अंक नाघेको संकेत गर्छ।
आज १९९ कम्पनीको मूल्य बढ्दा ४९ कम्पनीको घट्यो। कारोबार रकम पनि अघिल्लो दिनको तुलनामा उल्लेख्य रूपमा बढेर ७ अर्ब ४५ करोड रुपैयाँ पुगेको छ। अघिल्लो दिनको कारोबार ६ अर्ब ५७ करोड रुपैयाँ थियो।
बजारमा बैंकिङ समूहले सबैभन्दा ठूलो प्रभाव पार्यो, जसको सूचक १.६८ प्रतिशतले बढ्यो। अन्य बढेका समूहहरूमा विकास बैंक ०.३४, होटल तथा पर्यटन ०.२८, हाइड्रोपावर ०.५४, लगानी १.३७, जीवन बीमा ०.२४, उत्पादन तथा प्रशोधन ०.९५, माइक्रोफाइनान्स ०.८५, निर्जीवन बीमा ०.२४, अन्य ०.३० र व्यापार समूह ०.३४ प्रतिशतले उकालो लागे। फाइनान्स समूह भने ०.३८ प्रतिशतले घट्यो।
सबैभन्दा बढी मूल्य बढ्ने कम्पनी बरुण हाइड्रोपावर रह्यो, जसको मूल्य ६.२१ प्रतिशतले उक्लियो। त्यसपछि पञ्चकन्या माइ हाइड्रोपावर (४.२८%), एनआईसी एशिया बैंक (३.९३%), सीईडीबी होल्डिङ्स (३.८८%) र न्यादी हाइड्रोपावर (३.७४%) क्रमशः अगाडि रहे।
वाणिज्य बैंकहरूमध्ये एनआईसी एशियापछि माछापुच्छ्रे, लक्ष्मी सनराइज, कृषि विकास, सिटिजन्स, ग्लोबल आईएमई, प्रभु र कुमारी बैंकको मूल्यमा उल्लेख्य वृद्धि देखिएको छ।
अर्कोतर्फ, ग्रिन डेभलपमेन्ट बैंकको मूल्य सबैभन्दा धेरै ४.४१ प्रतिशतले घट्यो। पिपुल्स हाइड्रोपावर, राप्ती हाइड्रो र खानीखोला हाइड्रोपावरको मूल्य पनि घट्ने प्रमुख कम्पनीमा परे।
कारोबारमा अगाडि रहने कम्पनीहरूमा राधि विद्युत् कम्पनी, बुटवल पावर, एनआरएन इन्फ्रास्ट्रक्चर, गार्डियन माइक्रोलाइफ इन्स्योरेन्स र नेपाल पुनर्बीमा कम्पनी रहेका छन्।
आजको कारोबारपछि बजारको कुल पूँजीकरण ४५ खर्ब ८ अर्ब रुपैयाँ पुगेको छ।
