तेहरान । इजरायल र इरानबीचको हालैको युद्धपछि सुरक्षित बंकरमा लुकेर बसेका इरानका सर्वोच्च नेता आयतोल्लाह अली खामेनी पाँच दिनपछि सार्वजनिक रूपमा देखिएका छन्।
सरकारी मिडियाका अनुसार खामेनी एक धार्मिक कार्यक्रममा सहभागी हुँदै तेहरानको इमाम खोमेनी मस्जिदमा देखा परेका हुन्। यो अवसर शिया मुस्लिमहरूको महत्वपूर्ण पर्व इमाम हुसैनको शहादत दिवस मनाउने अवसर थियो।
इरानी टेलिभिजनमा प्रसारित फुटेजमा उनी कालो पोशाकमा उपस्थित भीडलाई अभिवादन गरिरहेको देखिन्छ। भिडले “हाम्रो नेताका लागि हाम्रो नसामा रगत छ” भन्दै नाराबाजी गरेको दृश्य पनि सार्वजनिक भएको छ।
सन् १९८९ देखि इरानको सर्वोच्च नेताको भूमिकामा रहेका खामेनी जुन १३ मा इजरायली हवाई आक्रमणपछि पहिलोपटक प्रत्यक्ष रूपमा देखिएका हुन्। यद्यपि, गत साता संसद सदस्यहरूसँग भेटेको भनिएको पूर्व रेकर्ड गरिएको भिडियो सार्वजनिक गरिएको थियो।
हालको इरान–इजरायल तनाव आणविक कार्यक्रमलाई लिएर चुलिएको हो। इजरायलले इरान आफ्नो आणविक परीक्षणको अन्तिम चरणमा पुगेको भन्दै हमला गरेको थियो। त्यसको जवाफमा इरानले पनि व्यापक प्रतिक्रिया दिएको थियो।
इरानी प्रशासनका अनुसार इजरायली आक्रमणमा ९०० भन्दा बढी मानिसको मृत्यु भएको छ भने इरानको जवाफी आक्रमणमा कम्तीमा २८ इजरायलीको ज्यान गएको पुष्टि भएको छ।
खामेनीको सार्वजनिक उपस्थिति इरानी जनतालाई मनोबल दिने प्रयासका रूपमा हेरिएको छ। परिस्थिति यद्यपि अझै तनावग्रस्त छ।
