काठमाडौं । राष्ट्रिय स्वतन्त्र पार्टी (रास्वपा)को निरन्तर अवरोधका कारण प्रतिनिधिसभाको बैठक स्थगित गरिएको छ। बिहीबार बिहान ११ बजेसम्मका लागि सूचना टाँसी बैठक स्थगित गरिएको संघीय संसद सचिवालयले जनाएको छ।
रास्वपाले भिजिट भिसा प्रकरणमा संलग्न गृहमन्त्री रमेश लेखकको राजीनामा र उच्चस्तरीय छानबिन समिति गठनको माग गर्दै सदन अवरुद्ध गर्दै आएको छ। उक्त मागमा राष्ट्रिय प्रजातन्त्र पार्टी (राप्रपा)ले पनि समर्थन जनाएको छ।
यद्यपि सत्तारुढ माओवादी केन्द्रसँग दुई बुँदे सहमति भइसके पनि रास्वपा र राप्रपाले उक्त सहमति अस्वीकार गरेका छन्। सदन सञ्चालनको प्रयासस्वरूप सभामुख देवराज घिमिरेले गृहमन्त्री र प्रमुख पाँच दलका प्रमुख सचेतकहरूसँग छलफल गरे पनि कुनै सहमति जुट्न सकेन।
सभामुखले दलहरूलाई सहमति निर्माणका लागि थप संवाद गर्न निर्देशन दिँदै बैठक स्थगित गरेका हुन्।
