काठमाडौँ। उपप्रधान तथा अर्थमन्त्री विष्णुप्रसाद पौडेलले आर्थिक वर्ष २०८१/८२ को आर्थिक सर्वेक्षण प्रतिनिधिसभामा प्रस्तुत गरेका छन्। चालु आर्थिक वर्षको पहिलो आठ महिना र अघिल्लो वर्षको समग्र आर्थिक, सामाजिक र भौतिक विकास अवस्थाको विश्लेषण समेटिएको सर्वेक्षण मंगलबार संसदमा पेश गरिएको हो।
अर्थमन्त्री पौडेलका अनुसार चालु वर्षको आर्थिक वृद्धि दर ४.६१ प्रतिशत हुने अनुमान गरिएको छ। कोशी, मधेश र सुदूरपश्चिम बाहेक सबै प्रदेशको वृद्धि दर राष्ट्रिय औसतभन्दा माथि रहने उल्लेख गरिएको छ। चालु वर्षमा नेपालको कुल अर्थतन्त्रको आकार ६१ खर्ब ७ अर्ब रुपैयाँ पुग्ने अनुमान छ।
कुल गार्हस्थ उत्पादन (जीडीपी) मा कृषि क्षेत्रको योगदान २५.१६ प्रतिशत, उद्योग क्षेत्रको १२.८३ प्रतिशत र सेवा क्षेत्रको ६२.०१ प्रतिशत रहने अनुमान गरिएको छ। यस्तै, प्रतिव्यक्ति कुल राष्ट्रिय आय १,५१७ अमेरिकी डलरमा पुगेको र औसत उपभोक्ता मुद्रास्फीति ४.७२ प्रतिशत रहेको जानकारी पनि मन्त्री पौडेलले दिएका छन्।
