काठमाडौं। पूर्वराजा ज्ञानेन्द्र शाहका समर्थकहरूले गरेको प्रदर्शनलाई मध्यनजर गर्दै त्रिभुवन अन्तर्राष्ट्रिय विमानस्थल प्रवेशमा सुरक्षा कडाइ गरिएको छ।
सुरक्षा व्यवस्था कडा
चक्रपथसँग जोडिएको गोल्डेन गेटमा जनपथ र सशस्त्र प्रहरी बाक्लो संख्यामा तैनाथ छन्। सुरक्षाकर्मीहरूले सोधपुछ र कडाइका साथ चेकजाँचपछि मात्र प्रवेश अनुमति दिइरहेका छन्।
केही मोटरसाइकलमा आएका समर्थकहरूलाई विमानस्थल प्रवेश नै रोकिएको छ।
पूर्वराजाका समर्थकको भीड
पूर्वराजा शाह पोखरामा एक साताको बसाइपछि हवाईमार्ग हुँदै काठमाडौं फर्किँदैछन्।
उनलाई स्वागत गर्न राप्रपा, राप्रपा नेपाल, शिव सेना नेपाल र विभिन्न राजावादी संघसंस्था विमानस्थल पुगेका छन्।
समर्थकहरूले राष्ट्रिय झण्डा र शाहको तस्वीर भएको ब्यानर बोकेका छन्।
भिड बढ्दै जाँदा सवारी आवागमनसमेत प्रभावित भएको छ।
काठमाडौंमा सुरक्षा सतर्कता बढाइयो
राजावादीहरू सडकमा उत्रिएपछि काठमाडौंका विभिन्न क्षेत्रमा सुरक्षा सतर्कता बढाइएको छ।
भिड अनियन्त्रित हुन नदिन र अवाञ्छित क्रियाकलाप रोक्न सुरक्षाकर्मीलाई ‘हाई अलर्ट’मा राखिएको छ।
