काठमाडौं । त्रिभुवन विश्वविद्यालय (त्रिवि) ले आगामी चैत ५ गते हुने स्वतन्त्र विद्यार्थी युनियन (स्ववियु) निर्वाचनको प्रक्रिया औपचारिक रूपमा सुरु गरेको छ।
विद्यार्थी कल्याण तथा खेलकुद निर्देशनालयका निर्देशक पशुपति अधिकारीका अनुसार त्रिवि आङ्गिक र सम्बन्धनप्राप्त क्याम्पसहरूमा सोमबार बेलुकासम्म विभिन्न विद्यार्थी सङ्गठनले आफ्नो नाम दर्ता गराएका छन्। ‘विगतभन्दा धेरै क्याम्पसमा यसपटक निर्वाचन हुँदैछ,’ उनले बताए।
यसअघि त्रिविले स्ववियु निर्वाचनसम्बन्धी निर्देशिका तथा आचारसंहिता जारी गरिसकेको छ। त्रिविका ६२ आङ्गिक क्याम्पस र १,०४० सम्बन्धनप्राप्त क्याम्पसमा एकै दिन मिश्रित निर्वाचन प्रणाली र २८ वर्षे उमेर हद को व्यवस्थासहित निर्वाचन हुन लागेको हो।
