काठमाडौं । राष्ट्रिय सभाले आइतबार एकै दिन चार वटा विधेयक पारित गरेको छ।
बैठकले नेपाल कानुन व्यवसायी परिषद् (दोस्रो संशोधन) विधेयक पारित गरेको छ, जसको उत्पत्ति राष्ट्रिय सभामै भएको थियो। अब यो विधेयक प्रतिनिधि सभामा पठाइनेछ।
यसबाहेक, भ्रष्टाचार निवारण (पहिलो संशोधन) विधेयक, सुरक्षित कारोबार (पहिलो संशोधन) विधेयक र विधायन सम्बन्धी विधेयक पुनः पारित भएका छन्। यी तीन विधेयक यसअघि राष्ट्रिय सभाबाट पारित भएर प्रतिनिधि सभामा गएका थिए। प्रतिनिधि सभाले पारित गरेर फिर्ता गरेपछि राष्ट्रिय सभाले पुनः पारित गरेको हो।
संविधान अनुसार, एउटै सभामा उत्पत्ति भएको विधेयक अर्को सभाबाट पारित भएपछि पुनः सोही सभामा फर्काइन्छ। त्यसपछि सम्बन्धित सभाले संशोधन स्वीकार गरेपछि सदन प्रमुखले प्रमाणित गर्छन्। प्रमाणित भएको विधेयक राष्ट्रपतिसमक्ष पेस गरिन्छ, जसले प्रमाणीकरण गरेपछि ऐनका रूपमा लागू हुन्छ।
