काठमाडौं। काठमाडौं महानगरपालिकाका मेयर बालेन्द्र शाह (बालेन) द्वारा प्रधानमन्त्री केपी शर्मा ओलीलाई लक्षित गर्दै लेखिएको स्ट्याटसप्रति नेकपा एमालेका महासचिव शंकर पोखरेलले प्रतिक्रिया जनाएका छन्।
महासचिव पोखरेलले सामाजिक सञ्जालमार्फत बालेनको टिप्पणीप्रति ध्यानाकर्षण गर्दै सरकारले कार्यकारी अधिकृत नपठाएको आरोप लगाउनु मात्र पर्याप्त नभएको बताएका छन्। उनले हाल कार्यकारी अधिकृतहरू महानगरमा जान किन अनिच्छुक छन् भन्ने कुरामा बालेनले विचार गर्नुपर्ने आवश्यकता रहेको औंल्याएका छन्।
“काठमाडौं महानगरका मेयर बालेनले सरकारले कार्यकारी अधिकृत नपठाएको भन्दै आक्रोश व्यक्त गरेका छन्। तर, पछिल्लो समय किन कार्यकारी अधिकृतहरू महानगर जान चाहिरहेका छैनन् भन्ने विषयमा उनको ध्यान पुगेको देखिँदैन। जे कारणले भए पनि सरकारले विशेष व्यवस्था गरेर अविलम्ब कार्यकारी अधिकृत पठाउनु आवश्यक छ। कार्यकारी अधिकृतको अभावले महानगरको सेवा प्रवाह र अन्य काममा असर पर्न सक्छ।”
बालेनले शुक्रबार साँझ सामाजिक सञ्जालमा लेख्दै प्रधानमन्त्री ओलीलाई लक्षित गर्दै सरकार आफूलाई हराउन लागेको भए पनि देशलाई नडुबाउन आग्रह गरेका थिए। उनले आफ्नो स्ट्याटसमा लेखेका थिए:
“प्रधानमन्त्रीज्यू, भोको पेट मारेर मलाई हराउन खोज्नुभएको छ। हामी त तपाईंकै मदन भण्डारीको सपना पूरा गर्न हिँडेको मान्छे! मलाई हराउने ताकमा देशलाई चाहिँ नडुबाउनु होला!!”
बालेनको यो टिप्पणीले सामाजिक सञ्जालमा व्यापक चर्चा पाएको छ। उनका समर्थकहरूले सरकार काठमाडौं महानगरको कामलाई अवरोध गर्न खोजेको आरोप लगाइरहेका छन् भने एमाले निकट पक्षले बालेनले विषयको वास्तविकता बुझ्नुपर्ने भन्दै प्रतिक्रिया दिइरहेका छन्।
