वीरगन्ज। जिल्ला प्रहरी कार्यालय पर्सा तस्करीविरुद्ध आक्रामक कारबाही गर्दै एक महिनामै ८ करोड १२ लाख रुपैयाँभन्दा बढीको भन्सार छलीको सामान बरामद गर्न सफल भएको छ।
प्रहरी उपरीक्षक गौतम मिश्रको नेतृत्वमा पर्सा प्रहरीले तस्करी, हुण्डी, लागुऔषध, घरेलु मदिरा तथा आपराधिक गतिविधिहरूविरुद्ध व्यापक कारबाही चलाएको हो।
एसपी मिश्रले माघ १४ गते पर्सा प्रहरी प्रमुखको कार्यभार सम्हालेपछि तस्करी नियन्त्रणलाई प्राथमिकता दिएका छन्। फागुन १४ गतेसम्म जिल्लाका विभिन्न युनिटहरूले ८ करोड १२ लाख ८ हजार रुपैयाँ बराबरको भन्सार छलीको सामान बरामद गरेका छन्।
यस क्रममा भन्सारबाट जाँचपास भएर छुटेका तर बिल बिजकभन्दा बढी सामान लोड गरिएका ट्रकहरू प्रहरीले नियन्त्रणमा लिएको छ। यी ट्रक तथा बरामद सामानहरू राजस्व अनुसन्धान कार्यालय पथलैया र भन्सार कार्यालय पर्सामा बुझाइएको छ।
प्रहरीले सोही अवधिमा २३ लाख रुपैयाँसहित तीन जना हुण्डी कारोबारीलाई पक्राउ गरी कारबाही प्रक्रिया अघि बढाएको छ।
एसपी मिश्रको सक्रियतामा जिल्लाका विभिन्न स्थानमा लगाइएका लागुऔषध खेती नष्ट गरिएको छ।
एक महिनाको अवधिमा ३४४ जना फरार प्रतिवादी पक्राउ गरिएको छ।
घरेलु मदिराको उत्पादन र बिक्रीवितरण नियन्त्रण गर्न प्रहरीले विशेष अभियान चलाएको छ।
प्रहरीले बसपार्कलगायतका चार वटा होटलमा छापा मारी
“प्रहरी सम्पूर्ण नागरिकको साथमा छ। ढुक्क भएर अपराधबारे सूचना दिनुहोस्, सूचना दिने व्यक्तिको गोपनीयता पूर्ण रूपमा सुरक्षित राखिन्छ,” एसपी मिश्रले नागरिकहरूलाई आग्रह गरे।
उनले शून्य सहनशीलताको नीति अपनाई अपराध नियन्त्रणमा पूर्ण रूपमा व्यावसायिक ढंगले अघि बढ्ने प्रतिबद्धता व्यक्त गरे। एसपी मिश्रको आक्रामक कारबाहीका कारण तस्कर, हुण्डी कारोबारी, लागुऔषध व्यापारी तथा आपराधिक गतिविधिमा संलग्न व्यक्तिहरू त्रसित बनेका छन्।
