काठमाडौं । परराष्ट्र मन्त्रालयले थाइल्यान्ड र म्यानमार यात्रासम्बन्धी ट्राभल एडभाइजरी जारी गर्दै यी मुलुकमा जान लागेका नेपाली नागरिकहरूलाई विशेष सतर्कता अपनाउन आग्रह गरेको छ। मन्त्रालयले बिहीबार जारी गरेको विज्ञप्तिमा मानव बेचबिखन, ठगी तथा आपराधिक गतिविधिहरूको जोखिम बढेकाले नेपालीहरू सचेत रहनुपर्ने उल्लेख छ।
परराष्ट्र मन्त्रालयका अनुसार हाल सूचना प्रविधि (आईटी) क्षेत्रका आकर्षक रोजगारीका अवसरको लोभमा नेपालीहरू ठगीमा परेका घटनाहरू वृद्धि भइरहेका छन्। उच्च तलब र सुविधाको प्रलोभनमा नेपालीहरू फसाइने र उनीहरूलाई शोषणमा पारिएको सूचना प्राप्त भएको छ।
मन्त्रालयका अनुसार पछिल्लो समय थाइल्यान्ड हुँदै म्यानमारको जोखिमयुक्त क्षेत्रमा जबर्जस्ती नेपालीहरूलाई लगिएको घटनाहरू उल्लेख्य रूपमा बढेका छन्।
परराष्ट्र मन्त्रालयले कुनै पनि शंकास्पद रोजगार प्रस्ताव स्वीकार गर्नु अघि परराष्ट्र मन्त्रालय वा नेपाली दूतावाससँग सम्पर्क गर्न अनुरोध गरेको छ। यसबारे थप जानकारी वा सहायता आवश्यक परेमा नजिकको नेपाली दूतावास वा सम्बन्धित निकायसँग सम्पर्क गर्न मन्त्रालयले अनुरोध गरेको छ।
