काठमाडौं। अर्थ मन्त्रालयको सचिवमा घनश्याम उपाध्याय नियुक्त भएका छन्। उनलाई आज मन्त्रालयमा स्वागत गरिँदा, यसअघि अर्थ सचिव रहेका डा. रामप्रसाद घिमिरेलाई बिदाइ गरिएको छ।
अर्थ मन्त्रालयमा आयोजित विशेष कार्यक्रममा उपाध्यायलाई स्वागत र घिमिरेलाई बिदाइ गरिएको हो। मन्त्रिपरिषद्को हिजोको बैठकले उपाध्यायलाई अर्थ सचिवमा नियुक्त गर्ने र घिमिरेलाई राष्ट्रपति कार्यालयमा सरुवा गर्ने निर्णय गरेको थियो।
कार्यक्रममा उपप्रधानमन्त्री एवं अर्थमन्त्री विष्णुप्रसाद पौडेलले अर्थ सचिव उपाध्यायको प्रशासनिक नेतृत्वमा अर्थ मन्त्रालयले राष्ट्र र जनताको अपेक्षा पूरा गर्ने विश्वास व्यक्त गरे।
त्यस्तै, उनले डा. घिमिरेले अर्थ सचिवको रूपमा आर्थिक अनुशासन र गतिशीलता कायम गर्न इमानदार योगदान दिएको भन्दै उनको अनुभव र ज्ञान आगामी दिनमा पनि अर्थ मन्त्रालयका लागि उपयोगी हुने बताए।
अर्थ सचिव उपाध्यायले नेपाल सरकार र अर्थमन्त्रीप्रति कृतज्ञता व्यक्त गर्दै आफ्नो कार्यकालमा राजस्व वृद्धि, पूँजीगत खर्च वृद्धि, अनावश्यक खर्च कटौती, उत्पादन वृद्धि लगायतका क्षेत्रमा काम गर्दै थप लगानीका लागि अनुकूल वातावरण सिर्जना गर्ने प्रतिबद्धता जनाए।
