काठमाडौं । राष्ट्रिय सभा सदस्य वामदेव गौतमले समाजवाद निर्माण गर्न सकिने ठोकुवा गर्दै त्यसो गर्न नसके मृत्युदण्ड भोग्न समेत तयार रहेको बताएका छन्। आइतबार राष्ट्रिय सभा बैठकमा सम्बोधन गर्दै उनले यो दृढ प्रतिबद्धता व्यक्त गरेका हुन्।
“समाजवादको संरचना निर्माण गर्न सकिन्छ,” गौतमले भने, “म आफूलाई दाउमा राख्न चाहन्छु। यदि तोकिएको समयभित्र समाजवाद निर्माण गर्न सकिएन भने, म मृत्युदण्ड स्वीकार्न तयार छु।”
राजनीतिक वृत्तमा अध्यादेशबारे बहस चलिरहेका बेला गौतमले अध्यादेश न त समर्थन गर्ने न त विरोध गर्ने पक्षमा रहेको बताए। “अध्यादेश मुख्यतः राज्य सञ्चालनका लागि सत्ताधारी शक्तिलाई सकारात्मक सहयोग पुग्नेगरी निर्माण गरिएको संवैधानिक संरचना हो,” उनले भने, “तर, प्रजातान्त्रिक परिपाटी उल्लंघन नहोस् भनेर अध्यादेश जारी गर्दा धेरै शर्तहरू पूरा गर्नुपर्छ।”
गौतमले हालको अस्थिर राजनीतिक अवस्था प्रति संकेत गर्दै “खिचडी राजनीति” बहिष्कार गर्नुपर्ने धारणा व्यक्त गरे। उनका अनुसार स्थायित्वको अभावले मुलुकलाई सही मार्गमा अघि बढ्न कठिनाइ भइरहेको छ। गौतमको भनाइले समाजवादको सम्भाव्यता, अध्यादेशको संवैधानिकता र राजनीतिक स्थायित्वका विषयमा पुनः बहस सिर्जना गर्ने देखिन्छ।
