काठमाडौं । लोकप्रिय गायिका एलिना चौहानले पति विष्णु सापकोटासँग सम्बन्धविच्छेदका लागि काठमाडौं जिल्ला अदालतमा मुद्दा दायर गरेकी छन्। शुक्रबार, वारेसमार्फत दायर गरिएको मुद्दामा एलिनाले अंश वा मानाचामलको कुनै दाबी नगर्ने उल्लेख छ। अदालतका सूचना अधिकारी दीपककुमार श्रेष्ठका अनुसार, उनले पति विष्णुसँग आफ्नो आर्थिक अधिकारको कुनै दाबी नगरी कानुनी रूपमा सम्बन्ध विच्छेद गर्न चाहेको स्पष्ट पारेकी छन्।
वैवाहिक सम्बन्धमा बढ्दो तनाव
झापाकी एलिना र बागलुङका विष्णु ०८१ वैशाख १ गते विवाहबन्धनमा बाँधिएका थिए। विष्णु अस्ट्रेलियामा व्यवसाय गर्दै आएका छन्।
फिरादपत्रमा एलिनाले वैवाहिक जीवनमा शंका र असहजताका कारण मानसिक तनाव खेप्नुपरेको उल्लेख गरेकी छन्।
– कार्यक्रमहरूमा ढिलाइ हुँदा पतिले शंका गर्ने
– बीचमै फोन गरेर घर फर्कन दबाब दिने
– कलाकारितामा संलग्नताप्रति असहयोग देखाउने
यी कारणहरूले गर्दा वैवाहिक सम्बन्ध सुमधुर हुन नसकेको र कानुनी रूपमा छुट्टिनु नै उचित हुने ठहर एलिनाको छ।
“भावनात्मक रूपमा सम्बन्ध टिक्न नसक्ने देखियो”
फिरादपत्रमा एलिनाले लेखेकी छन्,
“नेपाल फर्किएपछि पनि कलाकारितामा व्यस्त रहँदा पतिले चरित्रमाथि शंका गर्ने, लाञ्छना लगाउने जस्ता व्यवहारले मलाई मानसिक कष्ट भयो। यस्तो अवस्थामा हामीबीच सुमधुर सम्बन्ध रहन नसक्ने भएकाले सम्बन्धविच्छेद नै उचित देखिएको छ।”
अदालतसमक्ष निवेदन
एलिनाले मुलुकी देवानी संहिता, २०७४ को दफा ९५(ग) अनुसार सम्बन्धविच्छेदको माग गरेकी छन्।
उनको निवेदनमा उल्लेख छ:
-पति-पत्नीको सम्बन्ध कागजी रूपमा मात्र सीमित रहनु उचित छैन।
-वैवाहिक जीवन स्वतन्त्र रूपमा अगाडि बढाउनु नै उपयुक्त विकल्प हो।
-अंश तथा मानाचामल दाबी नगरी कानुनी रूपमा सम्बन्ध विच्छेद गरियोस्।
अब अदालतको निर्णय कस्तो आउँछ भन्ने प्रतीक्षा गर्नुपर्नेछ।
