काठमाडौं । प्रधानमन्त्री केपी शर्मा ओलीले आफू नेतृत्वको सरकार आगामी ०८४ सालसम्म स्थिर रहने र कुनै पनि प्रकारको अस्थिरता आउने सम्भावना नरहेको दाबी गरेका छन् । संघीय संसदको हिउँदे अधिवेशनलाई सम्बोधन गर्दै उनले विपक्षी दलका नेता र केही समीक्षकहरूको सरकारको स्थिरता बारेको भ्रमलाई नकारे ।
प्रधानमन्त्री ओलीले विपक्षी दलका नेताहरूको “सरकार ढल्छ” भन्ने बारम्बारको दाबीलाई आलोचना गर्दै भने, “विपक्षले सरकार ढल्ने जस्ता कुरा गर्दै हिँडिरहेको छ, तर यो सरकार ०८४ सम्म टसमस नहुने छ।”
उनले गायिका शान्तिरानी परियारले गाएको “म त ढलेँ, ढलेँ” गीतलाई सन्दर्भमा ल्याउँदै भने, “यो गीत मनोरन्जनका लागि उपयुक्त छ, तर राजनीतिमा यसको कुनै स्थान छैन। विपक्षी नेता यो गीत गाएर सरकारको अस्थिरता जताउन चाहन्छन्, तर यथार्थमा हाम्रो सरकार बलियो र स्थिर छ।”
प्रधानमन्त्री ओलीको भनाइ अनुसार, विपक्षी दलका नेताहरूले सरकार ढल्न लाग्यो, पुस मसान्त, माघे संक्रान्ति आदि जस्ता समयहरूमा पनि उक्त दाबी गरेका थिए। उनले थपे, “यो गीत पार्टी उत्सवका लागि ठीक होला, तर राजनीतिमा त्यसको स्थान छैन। यस्ता दाबी गरेर आफ्नो समय खेर फाल्नुअघि विपक्षी दलहरूले वास्तविकता बुझ्नुपर्छ।”
प्रधानमन्त्री ओलीले सरकारको स्थिरता र आगामी योजनाबारे विश्वास व्यक्त गर्दै भने, “०८४ सम्म यो सरकार कुनै पनि प्रकारको संकटको सामना नगरी टसमस नहुने छ।”
